हेटमायरको तूफानी इनिङ्स

काठमाडौं। वेस्ट इन्डिजले आईसीसी टी–२० विश्वकपको सुपर ८ मा जिम्बाबेविरुद्ध विस्फोटक ब्याटिङ गर्दै २५५ रनको विशाल योगफल खडा गरेको छ।

मुम्बईस्थित वानखेडे रंगशालामा टस हारेर पहिला ब्याटिङ थालेको वेस्ट इन्डिजले निर्धारित २० ओभरमा ६ विकेट गुमाउँदै २५४ रन बनाएको हो।

इनिङ्सको सुरुआत राम्रो हुन नसके पनि त्यसपछि वेस्ट इन्डिजका ब्याटरहरूले आक्रामक खेल प्रदर्शन गरे। ब्रान्डन किंग ९ रनमा तथा कप्तान शाइ होप १४ रनमा आउट भएपछि टोली दबाबमा देखिएको थियो।

तर, शिम्रोन हेटमायरले ३४ बलमा ७ चौका र ७ छक्कासहित ८५ रनको तूफानी इनिङ्स खेल्दै खेलको दिशा नै बदले। रोभम्यान पावेलले पनि ३५ बलमा ५९ रन जोड्दै महत्त्वपूर्ण साथ दिए। यी दुईबीचको साझेदारीले वेस्ट इन्डिजलाई ठूलो स्कोरतर्फ अघि बढायो।

अन्तिम ओभरहरूमा शेर्फेन रदरफोर्डले १३ बलमा अविजित ३१ रन प्रहार गरे भने रोमारियो शेफर्डले १० बलमा २१ रन जोडे। जेसन होल्डरले ४ बलमै १३ रन बनाउँदै इनिङ्सलाई झन् आक्रामक बनाए। वेस्ट इन्डिजले अन्तिम पाँच ओभरमा मात्रै ७५ रन जोड्दै जिम्बाब्वेका बलरमाथि पूर्ण दबाब सिर्जना गर्‍यो।

जिम्बाबेका रिचर्ड नगाराभा र ब्लेसिङ मुजाराबानीले समान २–२ विकेट लिए भने ब्राड इभान्स र ग्रेम क्रेमरले १–१ विकेट हात पारे।