अलराउन्डर वरीयतामा दीपेन्द्र चौथो स्थानमा उक्लिए

काठमाडौं। नेपाली राष्ट्रिय टोलीका दीपेन्द्रसिंह ऐरी आईसीसी टी–२० आईको अलराउन्डर वरीयतामा चौथो स्थानमा उक्लिएका छन्।

अन्तर्राष्ट्रिय क्रिकेट परिषद् (आईसीसी)ले बुधबार सार्वजनिक गरेको नयाँ वरीयतामा उनी चौथो स्थानमा उक्लिएका हुन्।

यसअघि उनी छैटौं स्थानमा थिए। तर, टी–२० विश्वकपमा सानदार प्रदर्शन गरेसँगै उनले आफ्नो वरीयतामा सुधार गरेका हुन्।

उनले चार खेलमा दुई अर्धशतकसहित १६९ रन बनाएका थिए। उनी सर्वाधिक रनकर्ताको सूचीमा तेस्रो स्थानमा छन्। यस्तै बलिङतर्फ उनले १३ ओभर गर्दै ८९ रन खर्चिएर २ विकेट लिएका थिए। उनको ती २ विकेट इङ्ल्यान्डविरुद्ध नै थियो। उक्त खेलमा नेपाल ४ रनले पराजित भएको थियो।

वरीयतामा पाकिस्तानका साइम अयुब शीर्ष स्थानमा उक्लिएका छन्। उनले ३०३ रेटिङ अंकसहित पहिलो स्थान ओगटेका हुन्।

दोस्रो स्थानमा जिम्बाब्वेका सिकन्दर रजा रहँदा भारतका हार्दिक पाण्ड्या तेस्रो स्थानमा छन्। नेपालका कुशल भुर्तेल एक स्थान सुधार्दै २२औं स्थानमा पुगेका छन्।

कप्तान रोहितकुमार पौडेल ३९ स्थान रहँदा गुल्शनकुमार झा १५ स्थान तल खस्किँदै ७२औं स्थानमा पुगेका छन्।