१२औंपल्ट खेल्दै नेपाल र युएई

काठमाडौं। आईसीसी पुरुष टी–२० विश्वकपको वार्म–अप खेलअन्तर्गत नेपाल र संयुक्त अरब इमिरेट्स (युएई) मंगलबार आमनेसामने हुँदैछन्।

चेन्नईस्थित ऐतिहासिक एमए चिदम्बरम स्टेडियममा खेल साँझ ५:१५ बजे सुरु हुने तालिका छ।

नेपाल र युएईबीच हालसम्म ११ खेल भएका छन्। तीमध्ये ६ खेलमा नेपालले जित हात पारेको छ। बाँकी ५ खेल भने युएईको पक्षमा छ।

यी दुई अन्तिमपल्ट विश्वकप छनोटअन्तर्गत १२ अक्टोबर २०२५ मा अल इमिरेतमा भिडेका थिए। उक्त खेलमा नेपाल १ रनले विजयी भएको थियो।

१४१ रनको लक्ष्य पछ्याएको युएईले निर्धारित २० ओभरमा ९ विकेट गुमाउँदै १३९ रन बनाएको थियो।

विश्वकपअघि यो खेल दुवै टोलीका लागि महत्त्वपूर्ण मानिएको छ।

एमए चिदम्बरम रंगशाला स्पिनमैत्री पिच मानिन्छ। त्यसैले ब्याटर र बलर दुवैलाई चुनौतीपूर्ण हुने अपेक्षा गरिएको छ।