बार्सिलनासँग हारेपछि प्रशिक्षक जाभीलाई रियलले निकाल्यो

काठमाडौं। स्पेनिस क्लब रियल मड्रिडले मुख्य प्रशिक्षक जाभी अलोन्सोलाई बिदा गर्दै ‘बी’ टोलीका प्रशिक्षक आल्भारो अर्बेलोआलाई नयाँ प्रशिक्षक नियुक्त गरेको छ।

क्लबले सोमबार जारी गरेको विज्ञप्तिमा अलोन्सो आपसी सहमतिमा बाहिरिएको जनाएको छ। यो घोषणा स्पेनिस सुपर कपको फाइनलमा बार्सिलोनासँग ३–२ ले पराजित भएको एक दिनपछि आएको हो। उक्त फाइनल साउदी अरेबियामा आयोजना गरिएको थियो।

विज्ञप्तिमा भनिएको छ,‘क्लब र जाभी अलोन्सोबीच आपसी सहमतिमा पहिलो टोलीको प्रशिक्षकका रूपमा उनको कार्यकाल समाप्त गर्ने निर्णय गरिएको छ। अलोन्सो रियलका एक लिजेन्ड हुन्। उनले सधैं मड्रिडिस्टाहरूको माया र सम्मान पाउनेछन्। रियल सधैं उनको घर रहनेछ।’

क्लबले उनलाई धन्यवाद दिँदै भविष्यका लागि शुभकामना पनि व्यक्त गरेको छ। अलोन्सोजस्तै नयाँ प्रशिक्षक आल्भारो पनि रियलका पूर्वखेलाडी हुन्।