युएईमाथि सहज जित निकाल्दै पाकिस्तान सुपर फोमा

काठमाडौं। संयुक्त अरब इमिरेट्स (युएई)लाई पराजित गर्दै पाकिस्तान सहज जित निकाल्दै एसिया कपको सुपर फोमा प्रवेश गरेको छ।

बुधबार सम्पन्न खेलमा पाकिस्तान ४१ रनले विजयी भएको हो। यससँगै ‘ए’ समूहबाट पाकिस्तान र भारत दुवैले सुपर फोमा स्थान पक्का गरेका छन्।

दुबई अन्तर्राष्ट्रिय क्रिकेट स्टेडियममा टस जितेर पहिले ब्याटिङ गर्दा पाकिस्तानले राम्रो सुरुआत पाएन। पहिलो दुई ओभरमै साइम अय्यूब र साहिबजादा फरहान शून्य तथा सानो योगफलमा आउट भए। त्यसपछि फखर जमन र कप्तान सलमान आघाले तेस्रो विकेटका लागि ६१ रनको साझेदारी गर्दै टोलीलाई संकटबाट बाहिर निकाले।

२० रन बनाएर सलमान आउट भएपछि फखरले अर्धशतक पुरा गरे (३५ बलमा), तर अर्को बलमै विकेट गुमाए। त्यसपछि पाकिस्तानको ब्याटिङ ध्वस्त हुँदै २३ बलभित्रै २४ रनमा ४ विकेट थप खस्यो।

अन्त्यतिर शाहिन शाह आफ्रिदीले १४ बलमा ३ चौका र २ छक्कासहित अविजित २९ रनको आक्रामक इनिङ्स खेलेपछि पाकिस्तान ९ विकेट गुमाएर १४६ रनसम्म पुग्यो। युएईका दाहिने हातका पेसर जुनैद सिद्दिकीले १८ रनमा ४ विकेट लिए।

सुपर फोमा पुग्ने आशा बोकेर ब्याटिङमा उत्रिएको युएईले पहिलो विकेटका लागि २१ रनको साझेदारी गरेको थियो। त्यसपछि शाहिन आफ्रिदीले विकेट निकाल्दै पाकिस्तानलाई जिततर्फ डोर्‍याए। पावरप्लेदेखि नै आबरार अहमद र साइम अय्यूबको स्पिनले दबाब बनाइराख्यो।

राहुल चोप्रा र ध्रुव पराशरले तेस्रो विकेटका लागि ४८ रनको साझेदारी गर्दै केही आशा जगाए पनि त्यो जोडी आउट भएसँगै युएईको मौका गुमा्यो। अन्तिम २० रनको अन्तरालमै उनीहरूले ७ विकेट गुमाए र १४ बल बाँकी छँदै १०५ रनमै समेटिए।

पाकिस्तानतर्फ शाहिन आफ्रिदी, आबरार अहमद र हारिस रउफले दुई–दुई विकेट लिए। उत्कृष्ट ब्याटिङ र बलिङ योगदानका आधारमा शाहिन शाह आफ्रिदी म्यान अफ द म्याच घोषित भए।