जापानमाथि नेपालको ९ विकेटको जित

काठमाडौं। शुभव खनालको सानदार बलिङसँगै नेपालले एसिसी यु-१६ इस्ट जाेन कपमा लगातार दोस्रो जित हात पारेको छ।

मंगलबार सम्पन्न खेलमा नेपाल ९ विकेटले विजयी भएको हो। जितसँगै नेपालले ४ अंक जोडेको छ। जापानले दिएको ८१ रनको लक्ष्य नेपालले १४.२ ओभरमा १ विकेट गुमाउँदै पूरा गर्‍यो।

नेपालका शिवान्स बजँगाईले अविजित रहँदै सर्वाधिक ३८ रन बनाए। ४२ बल खेलेका उनले ७ चौका प्रहार गरे। प्रशिद्ध जैशीले ३७ बलमा ३ चौकासहित ३३ रन बनाए। जोय थापा १ रनमा पभिलियन फर्किए। 

जापानका केइसी काबायाशीडोगेटले एक विकेट लिए।

पहिलो खेलमा नेपालले सिंगापुरलाई ६ विकेटले पराजित गरेको थियो। जापानले भने भुटानलाई २१५ रनले पाखा लगाउँदै २ अंक जोडेको थियो।

त्यसअघि मलेसियाकाे कोजल टुन्कु जाफर ओभलमा टस जितेर ब्याटिङ थालेको जापानले ३४.३ ओभरमा ८० रन बनाएको थियो।

जापानका कप्तान चार्ली हाराहिन्जेले सर्वाधिक ३६ रन बनाए। ४८ बल खेलेका उनले ४ चौका प्रहार गरे।  गाबी हाराहिन्जेले १३ रनको योगदान दिए। अन्य ब्याटरले भने सन्तोषजनक खेल देखाउन सकेनन्।

नेपालका शुभम खनालले सर्वाधिक ५ विकेट लिए। उनले १० ओभरमा १५ रन खर्चिए।

अभय यादवले २ तथा सुशीलबहादुर रावल र कप्तान विपिनप्रसाद शर्माले समान १ विकेट लिए।