पुलिस झापा महिला गोल्डकपको उपाधिनजिक

बिर्तामोड। मिना देउवा र रेखा पौडेलका गोलमा नेपाल पुलिस क्लबले संकटा फुटबल क्लबलाई २–० ले पराजित गर्दै झापा महिला गोल्डकपको फाइनलमा स्थान बनाएको छ।

शिवसताक्षीस्थित दुधे रंगशालामा शुक्रबार सम्पन्न पहिलो सेमिफाइनल खेलमा सुरुआतीदेखि नै दुवै टोलीबीच प्रतिस्पर्धात्मक खेल देखिएको थियो। खेलको पहिलो हाफमा दुवै टोलीले केही अवसर सृजना गरे। तर, गोल गर्न सकेनन्, जसले गर्दा यो संस्करणको पहिलो हाफ गोलरहित सकिएको खेल बन्यो।

दोस्रो हाफमा भने खेलको दिशा पुलिसतर्फ मोडियो। ७०औं मिनेटमा पूजा रानाको फ्रिकिकमा मिनाले हेडमार्फत गोल गर्दै टोलीलाई अग्रता दिलाइन्। ८२औं मिनेटमा कप्तान यशोदा शाहीको त्रुटिलाई सदुपयोग गर्दै रेखाले अर्को गोल गरिन्।

संकटाले खेलको अन्त्यतिर सान्त्वना गोल गर्ने अवसर पाएको थियो। तर, सेनु परियारको सट गोलपोस्ट नजिकैबाट बाहिरियो।