नारायणगढको लगातार तेस्रो जित

गोरखा। नारायणगढ फुटबल क्लबले १०औं ओसन कप यु–१३ राष्ट्रिय फुटबल प्रतियोगितामा लगातार तेस्रो जित निकालेको छ। 

गोरखास्थित द ओसन क्लबको कृतिम मैदानमा शुक्रबार सम्पन्न खेलमा नारायणगढले हिल्ली फिल्डर्स गोरखा एफसीलाई ४–० ले पराजित गरेको हो। नारायणगढको जितमा साजन कार्कीले ह्याट्रिक गरे। यस्तै, रोमस थापाको नाममा एक गोल रह्यो।

जितसँगै नारायणगढले तीन खेलबाट नौ अंक पुर्‍याएको छ। हिल्लीको भने यो पहिलो हार हो। यसअघि हिल्लीले  समाज कल्याण खेलकुद केन्द्रलाई ६–० ले पाखा लगाएको थियो। 

अन्य खेलमा नव जनजागृति क्लबले आयोजक द ओसन क्लबलाई ३–० ले हरायो। नव जनजागृतिको जितमा शैफुल्ला मियाले ह्याट्रिक गरे। 

कटारी टाइगर फुटबल क्लबले थ्री स्टार क्लबलाई ५–१ तथा श्री लक्ष्मी सामुदायिक शिक्षा सदनलाई ६–० ,  जि एन्ड ए एकेडेमीले श्री लक्ष्मी सामुदायिक शिक्षा सदनलाई ४–२, समाज कल्याणले घोडाघोडी फुटबल क्लबलाई ३–०, नव जनजागृति क्लबले द ओसनलाई १०–०, थ्री स्टारले श्री लक्ष्मी सामुदायिक शिक्षा सदनलाई ६–० र कटारीले जि एन्डलाई ३–० ले हरायो। 

यस्तै, पटिहानी फुटबल क्लब र द ओल्ड क्यापिटल माविले ३–३ को बराबरी खेले।