सन् २०२७ सम्म सालाह एनफिल्डमै रहने

काठमाडौं। लामो समयदेखि चल्दै आएको वार्तालाई औपचारिक रूपमा टुंग्याउँदै मोहम्मद सालाह अब सन् २०२७ सम्म एनफिल्डमै रहने भएका छन्।

यसै साता लिभपुलका खेलकुद निर्देशक रिचार्ड ह्युजसँगको वार्तामा सकारात्मक प्रगति भएपछि इजिप्टका स्टार फरवार्ड दुई वर्षको सम्झौता विस्तारमा हस्ताक्षर गरेका हुन्।

सुरुदेखि नै क्लब र खेलाडी दुवै पक्षले सम्झौतामा पुग्ने चाहना राखेका थिए। तर, लिभरपुलले सम्झौता गर्दा क्लबको आर्थिक संरचनामा असर पर्ने गरी कुनै निर्णय नगर्ने बताएको थियो।

सालाहको नयाँ सम्झौता उनको अघिल्लो सम्झौतासँग मिल्दोजुल्दो छ, जुन बोनस र प्रदर्शनमा आधारित रकमसहित चार लाखप्रति हप्ता पाउन्ड पुग्ने अनुमान गरिएको छ। सालाहले सिजनमा २० भन्दा बढी गोल गरेका छन्। त्यसैले प्राय: यी मापदण्ड पूरा भइरहेका छन्।

क्लबले यस समरमा टोली पुन: निर्माण गर्न धेरै खर्च गर्नुपर्ने भएकाले सलाह या अरु खेलाडीलाई अन्य क्लबहरूले प्रस्ताव गर्न सक्ने विशाल तलब दिन नसक्ने स्थितिमा थियो।

‘अवश्य पनि म निकै उत्साहित छु। अहिले हामीसँग उत्कृष्ट टिम छ। अघिल्लो टिम पनि राम्रो थियो। तर, हामीले थप उपाधि जित्न सक्छौं भनेर नयाँ सम्झौता गरेको हुँ,’ लिभरपुलको वेबसाइटसँग कुरा गर्दै सलाहले भने।

उनी सन् २०१७ मा इटालियन क्लब रोमाबाट लिभरपुल बसाइ सरेका हुन्। उनले आठ वर्ष लिभरपुलमा बिताइसकेका छन्। नयाँ सम्झौतासँगै उनले लिभरपुलमा १० वर्ष बताउने पक्का भएको छ।