उपाधिमा मच्छिन्द्र र हिमालयन शेर्पाको दाबी

सिमरा। १५औं जीतपुरसिमरा गोल्डकपको उपाधिका लागि शुक्रबार ‘ए’ डिभिजनका दुई टोली मच्छिन्द्र फुटबल क्लब र हिमालयन शेर्पा क्लब भिड्दै छन्। 

सिमरा रंगशालाको फ्लड लाइटमा शुक्रबार राति हुने प्रतियोगिताको अन्तिम भिडन्तमा दुवै टोली उपाधि जित्ने दाउमा हुनेछन्। मच्छिन्द्र दोस्रो पटक जीतपुरसिमरा गोल्डकपको फाइनलमा प्रवेश गरेको हो। 

अघिल्लो वर्ष १४औं संस्करणको फाइनलमा नेपाल पुलिस क्लबसँग पराजित हुँदै उपविजेतामा सीमित भएको मच्छिन्द्रले यसपल्ट पुलिसलाई क्वार्टरफाइनलमा हराउँदै मनोबल उच्च बनाएको छ। 

यता, चौथोपल्ट जीतपुरसिमरा गोल्डकपको फाइनल खेल्न लागेको हिमालयन शेर्पाले मच्छिन्द्रसँग यो वर्ष मोफसलका प्रतियोगितामा बेहोरेको हारको बदला लिने लक्ष्य राखेको छ। 

यसअघि पाँचथर र कपिलवस्तु तिलौराकोट गोल्डकपमा दुवै खेल मच्छिन्द्रले जितेको थियो। यी दुई प्रतियोगितामा बेहोरेको हारको बदला लिँदै वर्षको पहिलो उपाधि जित्ने लक्ष्यमा हिमालयन शेर्पा छ।

‘वर्षको पहिलो उपाधि जित्ने लक्ष्य लिएर मैदानमा उत्रने तयारीमा छौं। युवा खेलाडी सम्मिलित टोलीले हाम्रो लक्ष्य पूरा गर्दै यो वर्षको सुखद अन्त्य गर्छ भन्ने विश्वास लिएको छु,’ मुख्य प्रशिक्षक प्रज्जवल प्रताप क्षेत्रीले भने। 

यसअघि १३औं र चौथो संस्करणको फाइनलमा उपविजेता बनेको शेर्पाले ०६७ मा सम्पन्न प्रतियोगिताको दोस्रो संस्करणको उपाधि जितेको थियो। 

सिमरा रंगशालामा हुने अन्तिम भिडन्तमा मच्छिन्द्र पहिलोपल्ट प्रतियोगिताको विजेता बन्ने लक्ष्य राखेर मैदानमा उत्रनेछ। मच्छिन्द्र यो वर्ष मोफसलको चौथो उपाधि उचाल्दै राजधानी फर्कने योजनामा छ। 

मच्छिन्द्रले यो वर्ष काठमाडौंमा सम्पन्न केपी ओली कप, इटहरी गोल्डकप र कपिलवस्तु तिलौराकोट गोल्डकपको उपाधि जितिसकेको छ। ‘हामी सिजनको चौथो उपाधि जित्ने लक्ष्यमा छौं, मोफसलकै प्रतियोगितालाई लक्षित गरि टिम निर्माण गरिएको छ,’ मुख्य प्रशिक्षक सन्तोष न्यौपानेले भने।

मच्छिन्द्रले आफ्नो पहिलो खेलमा ल पुलिस क्लबलाई टाइब्रेकरमा ४–३ र सेमिफाइनलमा भरतपुरको हनामी बिएफसीलाई १–० ले पराजित गर्दै फाइनलको यात्रा तय गरेको थियो।

हिमालयन शेर्पाले भने क्वार्टरफाइनलमा फ्रेन्ड्स क्लबलाई १–० र सेमिफाइनलमा आयोजक सिमरालाई २–१ ले पराजित गर्दै फाइनल प्रवेश गरेको हो। 

जीतपुरसिमरा गोल्ड कपको हालसम्मका उपाधि विजेता 
२०८० नेपाल पुलिस क्लब
२०७९ चर्च ब्वाइज युनाईटेड
२०७८ न्युरोड टिम एनआरटी
२०७७ संकटा क्लब
२०७५ थ्रीस्टार क्लब
२०७४ त्रिभुवन आर्मी क्लब
२०७३ संकटा क्लब
२०७२ विजय युथ क्लब हेटौंडा
२०७१ त्रिभुवन आर्मी क्लब
२०७० नव जनजागृति युवा क्लब सिमरा
२०६९ मनाङ मस्र्याङदी क्लब
२०६८ मनाङ मस्र्याङदी क्लब
२०६७ हिमालयन शेर्पा क्लब
२०६६ मजदुर सहिद स्मृति क्लब