काठमाडौं। ह्यारी केन, एर्लिङ हलान्ड, रोमेलु लुकाकु, माटेओ रेतेगुई र मोइसे कीन यी सबै स्ट्राइकरहरूलाई इन्टर मिलानका डिफेन्डर फ्रान्चेस्को अचेर्बीले यो सिजन गोल गर्न दिएका छैनन्।
युरोप र सिरी ‘ए’ मा अचेर्बीको पछिल्लो उत्कृष्ट प्रदर्शन च्याम्पियन्स लिगको क्वार्टरफाइनलको पहिलो लेगमा बायर्न म्युनिखविरुद्ध पनि देखियो। ३७ वर्षे अचेर्बीले केनलाई केवल एकपटक सट प्रहार गर्ने मौका दिए, जुन केनले पोस्टमा हानेका थिए।
यो प्रदर्शन सेप्टेम्बरमा म्यानचेस्टर सिटीविरुद्ध हलान्डमाथि गरेको दबाबपूर्ण मार्किङ जस्तै थियो। उक्त खेल गोलरहित बराबरीमा सकिएको थियो। अचेर्बीले सन् २०२३ को च्याम्पियन्स लिग फाइनलमा पनि हलान्डलाई गोल गर्न दिएका थिएनन्।
समग्रमा इन्टरले यो सिजन च्याम्पियन्स लिगका ११ खेलमा मात्र तीन गोल खाएको छ। तीमध्ये अचेर्बी मैदानमा हुँदा मात्र दुई गोल खाएको छ। उनले डिसेम्बरमा बायर लेभरकुजेनसँगको १–० को हार ‘मिस’ गरेका थिए।
क्यान्सरको लडाइँ जितेर फर्किएका अचेर्बीले इटालियन लिग सिरी ‘ए’ मा पनि त्यत्तिकै प्रभाव जमाइरहेका छन्। लुकाकु र सिरी ‘ए’ का टप स्कोरर रेतेगुईलाई दुई–दुई खेलमा गोल गर्नबाट रोक्न उनी सफल भएका छन्।
लुकाकुसँगको दुवै खेल नापोलीविरुद्ध १–१ बराबरीमा सकियो। रेतेगुईको एटलान्टाविरुद्ध इन्टरले ४–० र २–० को सहज जित निकालेको थियो। यी जितले इन्टरलाई लिग तालिकामा शीर्ष स्थानमा पुर्याएको छ।
लुकाकु इन्टरबाट गएपछि अचेर्बीसँग चारपटक आमनेसामने भएका छन्। ती चारमध्ये दुई खेल लुकाकुले रोमाबाट खेलेका हुन्। यद्यपि, यी सबै खेलमा उनी गोल गर्न असफल रहे। रेतेगुई (२२ गोल) र कीन (१७ गोल) हाल सिरी ‘ए’ स्कोरिङ सूचीमा क्रमशः पहिलो र दोस्रो स्थानमा छन्।
कीनले इन्टरमाथि फिओरेन्टिनाको ३–० को जितमा दुई गोल गरेका थिए। तर, त्यो खेलमा अचेर्बी अनुपस्थित थिए। त्यसको चार दिनमै भएको रिम्याचमा अचेर्बी फर्किए, कीनलाई गोल गर्न दिएनन् र इन्टरले २–१ को जित निकाल्यो।
शनिबार काग्लियारीविरुद्धको खेलमा अचेर्बी विश्राममा बस्न सक्छन्। तर, अर्को साता सान सिरोमा बायर्न म्युनिखविरुद्धको दोस्रो लेगमा उनलाई पक्कै मैदानमा उतारिनेछ।
यदि इन्टरले पहिलो लेगको २–१ को अग्रतालाई कायम राख्न वा बढाउन सक्यो भने सेमिफाइनल र फाइनलमा अचेर्बीको अर्को ठूलो स्ट्राइकरसँग भिडन्त हुन सक्छ।
जुन महिनामा इटालीले हलान्डको टोली नर्वेविरुद्ध खेल्दै विश्वकप छनोटको सुरुआत गर्दैछ। यदि हलान्ड समयमै चोटमुक्त भए भने अचेर्बी फेरि तयार हुनेछन्, जस्ताको त्यस्तै रोकेको दोहोर्याउन।
