काठमाडौं। एभर्टनसँग १–१ को बराबरीमा रोकिएसँगै आर्सनलको प्रिमियर लिग उपाधि होडमा लिभरपुललाई पछ्याउने कमजोर आशा पनि लगभग समाप्त भएको छ।
उता एस्टन भिलाले नटिङ्घम फरेस्टमाथि २–१ को जित निकाल्दै च्याम्पियन्स लिगको छनोटको दौडमा आफूलाई बलियो बनाएको छ।
आर्सनलका लिआन्ड्रो ट्रोसर्डले ३४औं मिनेटमा गोल गर्दै अग्रता दिलाए। तर दोस्रो हाफको सुरुमा इलिमान न्दियाएले पेनाल्टीमार्फत गोल गर्दै खेल बराबरीमा ल्याए।
यो बराबरीसँगै आर्सनल अब लिभरपुलभन्दा ११ अंकले पछि परेको छ। लिभरपुलले आइतबार फुलह्यामको मैदानमा खेल्दैछ। यो नतिजाले लिभरपुललाई उपाधि जित्न झनै नजिक पुर्याएको छ।
बाँकी आठ खेलमा केवल ११ अंक जोड्न सके लिभरपुलले आफ्नो २०औं प्रिमियर लिग उपाधि जित्नेछ, जुन सन् २०२० यता पहिलो हुनेछ।
निराशाजनक प्रदर्शन
आर्सनलले पछिल्ला ६ लिग खेलमध्ये केवल दुईमा मात्रै जित निकालेको छ। त्यसैले आर्सनलको उपाधि आशामा गम्भीर धक्का लागेको हो। क्लबले सन् २००४ पछि पहिलो प्रिमियर लिग जित्न अझै कुर्नुपर्ने देखिन्छ।
प्रशिक्षक मिकेल आर्टेटाले च्याम्पियन्स लिगको पहिलो क्वार्टरफाइनल खेल रियल मड्रिडसँग खेल्नुअघि जित आवश्यक रहेको बताएका थिए। तर, उनले टिम छनोटमा मुख्य खेलाडीलाई बेन्चमा राख्दै च्याम्पियन्स लिगतर्फ ध्यान दिएको संकेत दिए।
बुकायो साका, मार्टिन ओडेगार्ड, ग्याब्रियल मार्टिनेली, जुरिएन टिम्बर र थोमस पार्टीजस्ता नियमित खेलाडी बेन्चमा रहे। दोस्रो हाफको सुरुआतमा माइल्स लुइस–स्केलीले ज्याक ह्यारिसनलाई फाउल गरेपछि एभर्टनले पेनाल्टी पायो। न्दियाएले ४९औं मिनेटमा सजिलै गोल गर्दै खेललाई बराबरीमा ल्याए।
-1743958565.JPG)
-1743953620.webp)
