काठमाडौं। बार्सिलोना शनिबार ला लिगामा रियल बेटिससँग १–१ को बराबरीमा रोकिएको छ।
जित निकाल्न नसकेपनि शीर्ष स्थानमा रहेको बार्सिलोनाले रियल मड्रिडसँगको अन्तर चार अंकले बढाउन सफल भएको छ। बार्सिलोनाले ३० खेलबाट ६७ अंक पुर्याएको छ।
दोस्रो स्थानको रियलको समान खेलबाट ६४ अंक छ। यसअघि नै रियलले घरेलु मैदानमा भ्यालेन्सियासँग इन्जुरी समयमा गोल खाँदै २–१ को हार बेहोरेको थियो।
बार्सिलोनाले खेलको सातौं मिनेटमै गाभीको गोलमार्फत अग्रता लिएको थियो। उनले सिक्स यार्ड बक्सभित्रबाट गोलरक्षक एड्रियनलाई छक्याउँदै सहज गोल गरे।
तर, त्यसपछि बार्सिलोनाले गोलको धेरै अवसर सिर्जना गरे पनि त्यसलाई सदुपयोग गर्न सकेन। १६औं मिनेटमा जिओभानी लो सेल्सोको कर्नरमा नातान सौजाले हेडरमार्फत बराबरी गोल गर्दै बेटिसलाई खेलमा फर्काएका थिए।
बार्सिलोनाले दोस्रो हाफमा लगातार आक्रमण गरे पनि गोलरक्षक एड्रियनको उत्कृष्ट बचाउ गरे। खेलको अन्त्यसम्म बेटिसले समय खेर फाल्दै खेललाई बराबरीमा ल्यायो।
‘हामी जितेको भए अन्तर अझै बढ्थ्यो, तर यो फुटबल हो,’ गाभीले मोभिस्टारलाई भने,‘हामीसँग धेरै अवसर थिए, तर गोल गर्न नसक्दा थोरै नरमाइलो अनुभूति भयो।’
अब रियलले च्याम्पियन्स लिगमा मंगलबार आर्सनलसँग खेल्दैछ भने बार्सिलोना बुधबार डोर्टमुन्डसँग भिड्नेछ। साथै अप्रिल २६ मा सेभिलमा हुने कोपा डेल रेको फाइनलमा यी दुई प्रतिद्वन्द्वी पुनः आमनेसामने हुनेछन्।
-1743958565.JPG)
-1743953620.webp)
