काठमाडौं। भिनिसियस जुनियरले पेनाल्टी मिस गरेपछि रियल मड्रिडले शनिबार ला लिगामा भ्यालेन्सियासँग २–१ को स्तब्ध पार्ने हार बेहोरेको छ।
घरेलु मैदान सान्टियागो बर्नाबेउमा बेहोरेको यो हारले उपाधि होडमा रहेका रियललाई ठूलो झट्का दिएको छ। भ्यालेन्सियाका ह्युगो डुरोले इन्जुरी टाइममा निर्णायक हेडर गोल गर्दै आफ्नो टोलीलाई यस सिजनको पहिलो ‘अवे’ जित दिलाए।
खेलको सुरुआतमै भिनिसियसले पाएको पेनाल्टीलाई गोलरक्षक जिओर्गी मामारदाश्विलीले जोगाए। त्यसको केही समयमै मौक्तार डियाखाबीले हेडर गोल गर्दै भ्यालेन्सालाई अग्रता दिलाए।
भिनिसियसले दोस्रो हाफको ५०औं मिनेटमा जुड बेलिङघमको हेडर पासमा नजिकबाट गोल गर्दै रियललाई खेलमा फर्काए। तर, त्यसपछि रियलले लगातार आक्रमण गर्दा पनि भ्यालेन्साको रक्षापंक्ति मजबुत देखियो र अन्ततः राफा मिरको क्रसमा डुरोले गोल गर्दै खेलको अन्त्यतिर भ्यालेन्सियालाई २–१ को अप्रत्याशित जित दिलाए।
यो जितसँगै भ्यालेन्सिया रेलिगेसन जोनबाट माथि उठ्दै १५औं स्थानमा पुगेको छ। भ्यालेन्सिया रेलिगेसन क्षेत्रभन्दा सात अंकले माथि छ। भ्यालेन्सियाका जाभी गुएराले भने,‘हामीले अवे जितेको थिएनौं। तर, जितका लागि बर्नाबेउभन्दा राम्रो ठाउँ अरू हुन सक्दैन।’
रियलका प्रशिक्षक कार्लो एन्सेलोट्टीले पहिलो रोजाइका दुई गोलरक्षक थिबाउ कोर्टुवा र आन्द्रिय लुनिन चोटग्रस्त हुँदा १९ वर्षीय फ्रान गोन्जालेजलाई पहिलो पटक सुरुआती टोलीमा मौका दिएका थिए।
भिनिसियसले यसअघि पनि च्याम्पियन्स लिगमा एट्लेटिको मड्रिडविरुद्ध पेनाल्टी मिस गरेका थिए। त्यसको आक्रोश बर्नाबेउमा समर्थकहरूको हुटिङमार्फत सुनिएको थियो।
