काठमाडौं। काठमाडौं रेजर्सलाई हराउँदै पोखरा थन्डर्सले नेपाल सुपर लिग (एनएसएल) मा पहिलो जित निकालेको छ।
त्रिपुरेश्वरस्थित दशरथ रंगशालामा शनिबार सम्पन्न दिनको पहिलो खेलमा पोखरा २–० ले विजयी भएको हो। जितसँगै पोखराले तीन अंक हात पारेको छ।
पोखरा तीन खेल खेल्दै पुछारबाट चौथो स्थानमा उक्लिएको छ। एफसी चितवनसँग २–० र साबिक विजेता ललितपुर सिटी एफसीसँग पोखरा ३–२ ले पराजित भएको थियो।
काठमाडौंको भने यो पहिलो हार हो। पहिलो खेलमा काठमाडौंले ललितपुरलाई २–२ को बराबरीमा रोकेको थियो। दोस्रो खेलमा झापा एफसीसँग काठमाडौं गोलरहित बराबरीमा रोकिएको थियो।
पोखराको जितमा स्टेफेन समीर विनोङ र र सुदील राईले गोल गरे। खेलको २५औं मिनेटमा विनोङले सुरुआती अग्रता दिलाएका थिए।
उज्वेकिस्तानका साइददोस्तोन जाफारोभले दिएको पासमा उनले बक्सभित्रबाट हेडरमार्फत गोल गरेका हुन्। उनको सटीक हेडरलाई काठमाडौंका गोलकिपर अभिषेक बरालले रोक्ने कुनै अवसर नै पाएनन्।
त्यसको आठ मिनेटपछि नै पोखराले पेनाल्टी पाएको थियो। अग्रता बढाउने अवसरमा अभिषेक बाधक बने। काठमाडौंका कप्तान कुलिदीप कार्कीले विनोङलाई बक्समा लडाएपछि पोखराले पेनाल्टी पाएको थिए। तर, विनोङको प्रहार अभिषेकले सहजै बचाए।
५९औं मिनेटमा पोखराले अग्रता दोब्बर बनायो। कप्तान आयुष घलानको क्रसमा सुदीलले गोल गरेका हुन्।
