काठमाडौं। क्रिस्टियानो रोनाल्डोले दोस्रो हाफमा दुई गोल गर्दै अल–नासरलाई शुक्रबार अल–हिलालमाथि ३–१ को जित दिलाए। यो जितले साउदी प्रो–लिगको उपाधि होडमा अल–नासरलाई बलियो स्थितिमा पुर्याएको छ।
अल–नासर ५४ अंकसहित तेस्रो स्थानमा यथावत् छ। अब अल–नासर दोस्रो स्थानमा रहेको अल–हिलालभन्दा तीन अंकले पछाडि छ भने शीर्ष स्थानको अल–इत्तिहादभन्दा सात अंकले पछाडि। अल–इत्तिहाद शनिबार अल–अहलीसँग खेल्दैछ।
खेलको पहिलो हाफमा अली अल–हसनले उत्कृष्ट कर्ल शटमार्फत गोल गर्दै अल–नासरलाई अग्रता दिलाए। दोस्रो हाफ सुरु भएको दुई मिनेटमै साडियो मानेको पासमा रोनाल्डोले सटीक प्रहार गर्दै स्कोर २–० बनाए।
गत सिजनको विजेता अल–हिलालले काउन्टर अट्याकमार्फत फर्किने प्रयास गर्यो। ६२औं मिनेटमा अली अल–बुलायहीले कर्नरपछि हेडरमार्फत गोल गर्दै गोलअन्तर घटाए।
तर, खेलको ८८औं मिनेटमा भिएआर समीक्षापछि माउतेब अल–हरबीले ह्यान्ड गरेको देखिएको थियो। त्यसपछि पेनाल्टीमा रोनाल्डोले गोल गर्दै अल–नासरको जित सुनिश्चित गरे।
‘टिमको प्रयास नै यो जितको मुख्य कारण हो। मैले गोल गर्नु महत्त्वपूर्ण हो, तर टिमले जित्नु अझै महत्त्वपूर्ण हो,’ रोनाल्डोले भने।
-1743823075.png)
