डि ब्रुएना भन्छन्– सिटीबाट अब ‘गुड बाई’ भन्नुपर्ने समय आएको छ

काठमाडौं। बेल्जियन प्लेमेकर केभिन डि ब्रुएनाले म्यानचेस्टर सिटीमा आफ्नो अन्तिम महिना सुरु भएको घोषणा गरेका छन्। उनले शुक्रबार एक्स (ट्विटर) मा एउटा भावुक पोस्टमार्फत यो जानकारी दिएका हुन्।

‘यो लेख्न सजिलो छैन। तर, हामी फुटबल खेलाडीहरूलाई थाहा हुन्छ कुनै न कुनै दिन यो क्षण आउँछ र त्यो दिन आज आएको छ,’ उनले लेखेका छन्।

डि ब्रुएना सन् २०१५ मा वोल्फ्सबर्गबाट करिब ७१ मिलियन डलरमा इङ्लिस क्लब सिटीमा आबद्ध भएका थिए। त्यसपछि उनले क्लबबाट ६ वटा प्रिमियर लिग, च्याम्पियन्स लिगसहित सबै प्रमुख उपाधि जितेका छन्।

कुल १४ वटा ठूला उपाधि जित्दै उनले आफूलाई प्रिमियर लिगकै महान् खेलाडीमध्ये एकको रूपमा स्थापित गरेका छन्।

‘यो सहर, यो क्लब र यी समर्थकहरूले मलाई सबैथोक दिए। त्यसैले मैले पनि सबैथोक फिर्ता दिनैपर्थ्यो। र के भयो त? हामीले सबैथोक जित्यौं!’ उनले लेखेका छन्,‘चाहेर होस् या नचाहेर अब गुड बाई भन्नुपर्ने समय आएको छ।’

डि ब्रुएनाले आफू जुन–जुलाईमा अमेरिका हुने क्लब विश्वकप खेल्ने कि नखेल्ने भन्ने खुलाएका छैनन्।