काठमाडौं। नेपाल सुपर लिग (एनएसएल) मा पहिलो जितको खोजीमा रहेको बुटवल लुम्बिनी एफसीले एफसी चितवनलाई चुनौती प्रस्तुत गर्दैछ।
त्रिपुरेश्वरस्थित दशरथ रंगशालामा साँझ ६ बजे हुने खेल चितवनका लागि दोस्रो र बुटवल लुमि्बनीका लागि तेस्रो हुन्। चितवनले पहिलो खेलमा पोखरा थन्डर्सलाई २–० ले हराउँदै सानदार सुरुआत गरेको थियो।
यसअघिका दुबै खेलमा पराजित भएको चितवनले तेस्रो संस्करणमा पुगेर पोखरामाथि जित निकाल्न सफल भएको हो। त्यसैले चितवन यही लय दोहोर्याउने लक्ष्यसहित शुक्रबार बुटवल लुम्बिनीविरुद्ध मैदान उत्रिने छ। तर, चितवनले झैं बुटवलले दुई खेल खेलिसक्दा पनि यस सिजन सुखद् नतिजा हात पार्न सकेको छैन।
पहिलो खेलमा गोलकिपर दीप कार्की नायक बन्दा बुटवल लुम्बिनीले करिब एक दर्जन गोलको अवसरलाई रोक्दै झापा एफसीलाई गोलरहित बराबरीमा रोकेको थियो। तर, त्यो खुसी दोस्रो खेलसम्म कायम रहन सकेन।
अहमद हिजाजीको दुई गोलसँगै धनगढी एफसीले बुटवल लुम्बिनीलाई ३–१ ले निराश बनाएको थियो। त्यसैले चार खेल खेल्न बाँकी रहेको बुटवल लुम्बिनीलाई अबका सबै खेल जित्नै पर्ने दबाब छ।
बुटवल लुम्बिनीको विगतको नतिजालाई कोट्याउने हो भने सुरुआत भने चितवनबाटै गर्न गर्न सक्छ। किनभने यसअघिका दुबै भेटमा यी दुई क्लब बराबरीमा रोकिएका छन्।
पहिलो संस्करणमा यी दुई टोलीले २–२ को बराबरी खेलेको थियो। दोस्रो संस्करणमा भने यी दुई टोलीले १–१ को बराबरी खेलेका थिए।
यस खेलमा चितवनले पहिलो खेलकै लय दोहोर्याएमा ६ अंकसहित शीर्ष स्थानमा उक्लिनेछ। पराजित भए बुटवल लुम्बिनीलाई चार अंक पुर्याउने मौका हुनेछ।
-1743823075.png)
