काठमाडौं। ब्राजिली स्टार नेयमारले साओ पाउलो राज्य च्याम्पियनसिपको सेमिफाइनल खेल गुमाउनुको कारण बताएपछि उनी आलोचनाको केन्द्रमा परेका छन्।
शनिबार भएको सेमिफाइनलमा सान्तोस आफ्नो कट्टर प्रतिद्वन्द्वी कोरिन्थियन्ससँग २–१ ले पराजित भयो। नेयमार पूरै ९० मिनेट बेञ्चमै बसे। सोमबार उनले हल्का चोट लागेको भन्दै खेल्न नसकेको स्पष्टीकरण दिए।
तर, केही दिनअघि मात्र नेयमार रियो दि जेनेरियोको साम्बाड्रोममा कर्निभल परेडमा देखिएका थिए। सान्तोसमा पुनः फर्किएपछि उनले मार्च २ मा भएको खेलमा चोटका कारण दोस्रो हाफमै मैदान छोडेका थिए।
नेयमारले लामो समयको घुँडाको चोट (एसिएल टियर) बाट निको भएसँगै पुनः मैदान फर्केका थिए। तर, सान्तोसले सेमिफाइनल अघि उनको चोटबारे कुनै औपचारिक जानकारी दिएको थिएन।
‘म मैदानमा उत्रिन चाहन्थें र टिमलाई सहयोग गर्न चाहन्थें,’ नेयमारले आफ्नो इन्स्टाग्राममा लेखे, ‘तर, बिहीबार मैले असहज महसुस गरें। परीक्षण गर्दा पुनः समस्या देखियो, जसका कारण म खेल्न सकिन।’
सान्तोसका प्रशिक्षक पेद्रो काइक्सिन्हाले नेयमारलाई चोटकै कारण बेञ्चमा बस्न आग्रह गरेको बताए। ‘उनी असाध्यै दुःखी थिए, खेल्न सक्दैनन् भन्ने थाहा पाउँदा निकै पीडामा थिए,’ उनले भने।
तर, फुटबल विश्लेषकहरूले भने नेयमारको व्यावसायिकताको प्रश्न उठाएका छन्। चर्चित समीक्षक वाल्टर कासाग्रान्डे जुनियरले सामाजिक सञ्जालमा लेखे, ‘उनी सेमिफाइनलभन्दा कर्निभललाई प्राथमिकता दिन पुगे। नेयमार पछिल्ला पाँच–छ वर्षदेखि व्यावसायिकताभन्दा मनोरञ्जनलाई प्राथमिकता दिइरहेका छन्।’
सान्तोसका अध्यक्ष मार्सेलो टेक्सेइराले नेयमारको चोट गम्भीर रहेको पुष्टि गरे। उनले भने,‘हामीले शुक्रबारदेखि आइतबारसम्म परीक्षण गर्यौं। सबैले उनलाई खेल्न अयोग्य देखाए। उनी पुनः स्वस्थ हुँदै छन्, त्यसैले कुनै जोखिम लिन चाहँदैनौं।’
स्पेनिस पत्रिका मार्काले लेख्यो, ‘बार्सिलोनाले हटाएपछि नेयमारको दुखद कर्निभल : बेञ्चमा बस्नुपर्यो, टिम बाहिरिए।’
तर, सान्तोसले एक भिडियो सार्वजनिक गर्दै सेमिफाइनल अघि नेयमारले ड्रेसिङ रुममा आँसु झार्दै टिमलाई प्रेरित गरिरहेको देखाएको छ। ‘यो क्षणमा बाहिर रहनु अत्यन्तै कठिन छ। म दौडेर तपाईहरूलाई मद्दत गर्न चाहन्थें,’ उनले भावुक हुँदै भने।
नेयमारले सान्तोस फर्किएपछि सात खेलमा तीन गोल र तीन असिस्ट गरिसकेका छन्। उनको प्रदर्शनले ब्राजिलका प्रशिक्षक डोरिभाल जुनियरलाई सन्तुष्ट गराएको छ। उनलाई कोलम्बिया र अर्जेन्टिनाविरुद्धको विश्वकप छनोट खेलका लागि बोलाइएको छ।
सान्तोसका लागि नेयमारको अर्को खेल मार्च २९ मा ब्राजिलियन लिगको पहिलो खेलमा भास्को दा गामाविरुद्ध हुनेछ। २०२३ मा रेलिगेट भएको सान्तोस फेरि शीर्ष लिगमा फर्किएको छ।
-1741704716.jpg)
-1741695909.JPG)
