काठमाडौं। नेपाली टिमकी मिडफिल्डर प्रीति राईले साफ च्याम्पियनसिप २०२४ मा ‘गोल्ड मेडल’ चुम्ने लक्ष्य प्राप्तिको बाटोमा हरेक खेल जित्नकै लागि खेल्ने बताएकी छन्।
घरेलु टिम नेपालले सेमिफाइनल प्रवेशको लागि समूह ‘बी’ को निर्णायक खेलमा विहीबार श्रीलंकाविरुद्ध दशरथ रंगशालामा प्रतिस्पर्धा गर्दैछ। यसै सन्दर्भमा २० वर्षीया प्रिती भन्छिन्, ‘विपक्षी भनेको विपक्षी नै हो। कसैलाई कमजोर सोंच्नुभन्दा उसलाई विपक्षी मानेर आफ्नो जे छ, त्यो खेल्नुपर्छ।’
माल्दिभ्सविरुद्ध ११–० ले जितेको खेलमा ह्याट्रिक गरेकी प्रितीले थपिन्, ‘हरेक खेल जित्नु नै पर्छ। हामी सबै खेल जित्नकै लागि खेल्छौं। मुख्य लक्ष्य गोल्ड मेडल हो। हामी लक्ष्यमा पुग्नकै लागि खेल्छौं। हामीलाई सबैले सपोर्ट गर्नुहोला।’
अनपेक्षित गोल, ह्याट्रिक र ३ अंक
माल्दिभ्सविरुद्ध मंगलबारको खेल प्रितीको २० औं क्याप हो, जहाँ उनले राष्ट्रिय टिमबाट खेल्दै पहिलो ह्याट्रिक पूरा गरिन्। यससँगै उनको अन्तर्राष्ट्रिय गोल संख्या ५ पुगेको छ।
‘ह्याट्रिकभन्दा पनि टिमले ३ अंक पायो, त्यसमा खुशी छु। अरु गेमहरूमा पनि राम्रो गर्ने सोंचिरेकी छु,’ मिडफिल्डका छरिता खेलाडी प्रितीले माल्दिभ्सविरुद्ध हालसम्मकै सबभन्दा फराकिलो जितबारे भनिन्, ‘माल्दिभ्सविरुद्ध मेरो पहिलो खेल हो र गोल अन्तर सोंचेकी थिइँन। ३ अंक सोंचेकी थिएँ। धेरै गोल हुँदा खुशी नै लाग्यो।’
आफ्नो ह्याट्रिकबारे प्रिती भन्छिन्, ‘पहिलो गोल अनपेक्षित हो। कसरी छिर्यो (पोष्टमा बल) मलाई नि थाह छैन। खासमा क्रस गर्न खोजेको हो तर स्कोर भयो। राम्रो भयो। दोस्रो गोल स्कोर नै गरेको हो। उमेर समूहमा पेनाल्टी एक–दुईपल्ट हानेको छु, स्कोर भएको छ। सिनियर टिमबाट हानेको थिएन तर दिदीहरूले मोटिभेट गर्नुभयो र मैले हानें (गोल)।’
माल्दिभ्सविरुद्धकै खेलमा स्ट्राइकर रेखा पौडेलले पनि आफ्नो पहिलो ह्याट्रिक गरेकी थिइन्। उक्त खेलमा उनी एक्लैले ५ गोल गर्न भ्याइन्। त्यसअघि पहिलो खेलमा भुटानविरुद्ध गोलरहित बराबरीले पूरा टिमलाई नै दबाबमा राख्दै मिहिनेत गर्नैपर्ने परिस्थिति सिर्जना भएको थियो।
-1732152881.jpg)
