स्वीकृतिबिनै उड्यो एन्फाको टोली

काठमाडौँ । राष्ट्रिय खेलकुद परिषद् (राखेप)को स्वीकृतिबिनै अखिल नेपाल फुटबल संघ (एन्फा) कार्यसमितिका दुई सदस्यसहित ८ जना बहराइन प्रस्थान गरेका छन्।

फिफा विश्वकप २०२६ तथा एशियन कप २०२७ छनोटअन्तर्गत घरेलु टोली बहराइनसँग चैत ८ र १३ गते हुन लागेको खेल हेर्न उनीहरू मंगलबार त्यसतर्फ प्रस्थान गरेका हुन्।

बहराइन जानेमा एन्फा कार्यसमिति सदस्यद्वय टीका लामा र मणिराज विष्ट रहेका छन्। विष्ट खुमलटारका अध्यक्षसमेत हुन्। उदयपुर जिल्ला फुटबल संघका अध्यक्ष रञ्जन कार्की, झापाका शेरबहादुर बस्नेत र श्री भगवती क्लबका राजकाजी श्रेष्ठ, जिल्ला सदस्य डोलेशकुमार केसी, महेशचन्द्र महत र भरतबहादुर क्षेत्री बहराइन प्रस्थान गरेका छन्।

‘खै पत्र आयो कि आएन त हामीलाई थाहा छैन। हामी सबै यहीँ छौँ। मन्त्रालय (युवा तथा खेलकुद)ले राखेपलाई पत्र पठायो भन्ने सुनेका थियौँ। त्यही पत्र पाएर त होला हामी सबैलाई बोर्डिङ पास दिएको,’ विष्टले खेलपाटीसँग भने।

राखेपले टिममा नभई नहुने भन्दै चिकित्सक राजु डंगोल महर्जन र खेल पत्रकार गोविन्दराज नेपाल बहराइन जान स्वीकृति दिएको थियो। महर्जन आइतबार बहराइन उड्ने तयारीमा थिए। तर, राखेप उनलाई सोमबार मात्रै स्वीकृति दिएको थियो। उनी सोमबार नै त्यसतर्फ प्रस्थान गरेका छन्।

नेपालले भने मंगलबार स्वीकृति पाएका थिए। अन्य ८ जनालाई भने स्वीकृति नदिएको संघसंस्था समन्वय समितिका प्रमुख चन्द्र राईले जानकारी दिए।

‘तिनीहरूको पुस्ता नै आएको छैन। पुस्ता लिएर आउनु भनेको थिएँ। अफिसियल मात्रै लेखेर आएको थियो। त्यसैले स्वीकृति दिएको छैन,’ उनले भने।