काठमाडौं । राष्ट्रिय खेलकुद परिषद् राखेपले अखिल नेपाल फुटबल संघ एन्फालाई २४ घण्टे स्पष्टिकरण सोधेको छ ।
परिषदले बिहीबार एन्फालाई पत्र लेख्दै विश्वकप छनोट खेल्न जाने टिमको सम्बन्धमा राखेपबाट स्वीकृति नलिनुको कारण के हो ? र फुटबल टिमसँग जाने अनावश्यक व्यक्तिहरु को हुन् र किन पठाएको भनेर स्पष्टिकरण सोधेको छ ।
एन्फाले बुधबार विश्वकप छनोटको तयारी स्वरुप राष्ट्रिय टिमका खेलाडी र अफिसियललाई मलेसिया पठाएको छ ।
खेलकुद ऐन अनुसार राखेपसँग स्वीकृति नलिएर फुटबलका पदाधिकारी विदेश पठाएको र राष्ट्रिय टिममा अनावश्यक १० व्यक्तिलाई समावेश गरेको भन्दै युवा तथा खेलकुद मन्त्रालयले एन्फालाई कारबाही गर्न राखेपलाई निर्देशन दिएको थियो ।
मन्त्रालयको निर्देशन अनुसार राखेपले एन्फालाई पत्र लेख्दै २४ घण्टाभित्र यथार्थ विवरण र कागजात पेश गर्न निर्देशन दिएको हो ।
बहराईनमा विश्वकप छनोटको दोस्रो चरणको म्याच खेल्न नेपाली टिम बुधबार मलेसिया प्रस्थान गरेको थियो । मलेसियामा तयारी गरेर नेपाली टिम बहराईन लाग्नेछ ।
नेपाली टिममा अनावश्यक १० फुटबलका पदाधिकारी मलेसिया जाने सूचीमा छन् । केही मलेसिया उडिसकेका छन् भने केही उड्ने क्रममा छन् ।
