काठमाडौं । नेपाल राष्ट्रिय तथा अन्तराष्ट्रिय खेलाडी संघले प्रत्येक वर्ष आयोजना गर्ने एनएनआईपीए स्पोर्ट्स अवार्डलाई केडिया ग्रुपले प्रायोजन गरेको छ ।
खेलाडी संघले चैत १२ गते आयोजना गर्ने तयारी गरेको अवार्ड कार्यक्रमलाई केडिया ग्रुपले प्रायोजन गरेको हो ।
केडिया ग्रुपका अध्यक्ष विमल केडिया र खेलाडी संघका अध्यक्ष दीपक श्रेष्ठले प्रायोजन सम्बन्धि सम्झौता पत्रमा बिहीबार हस्ताक्षर गरेका छन् ।
सम्झौताको अवधि ३ वर्षको रहेको छ । सम्झौता अनुसार केडिया ग्रुपले एक पुरुष र एक महिला सर्वोत्कृष्ट खेलाडीलाई सम्मान स्वरुप समान एक एक लाख र अवार्ड व्यवस्थापनका लागि ५० हजार गरि २ लाख ५० हजार रुपैयाँ उपलब्ध गराउनेछ ।
हरेक वर्ष विभिन्न खेलका उत्कृष्ट खेलाडीलाई सम्मान कार्यक्रम सञ्चालन गर्दै आईरहेको एनएनआईपीएले यस संस्करणमा ३६ खेलका उत्कृष्ट खेलाडीलाई सम्मान गर्न लागेको छ ।
प्रायोजन सम्झौता कार्यक्रममा संघका सचिव शिव शुन्दर कोथे, सचिव मन्डेकाजी श्रेष्ठ लगायतको उपस्थिती रहेको थियो ।
