काठमाडौं । अन्तर प्रदेश राष्ट्रिय खेलकुद प्रतियोगिता चैत २ गतेदेखि सुरु हुने भएको छ ।
बागमती प्रदेशको आयोजना रहने गरि सुरु गर्न लागिएको प्रतियोगिताको पहिलो संस्करण चैत २ गतेदेखि ८ गतेसम्म सञ्चालन हुने भएको हो ।
चैत २ गते हुने औपचारिक उद्घाटन चितवनको भरतपुरस्थित गौतमबुद्ध अन्तराष्ट्रिय क्रिकेट रंगशालामा गरिने आयोजक प्रदेश खेलकुद विकास परिषद्ले जानकारी दिएको छ ।
पहिलो अन्तर प्रदेश राष्ट्रिय खेलकुद प्रतियोगितालाई प्रधानमन्त्री पुष्पकमल दाहाल प्रचण्डले उद्घाटन गर्ने गरि तयारी थालिएको छ । प्रतियोगिताको समापन प्रदेश राजधानी हेटौडाको पिप्ले क्याम्पा रंगशालामा हुनेछ ।
संघीय संरचना अनुसार ७ प्रदेशको सहभागीता रहने प्रतियोगितामा ९ खेल विधा समावेश गरिएको छ । अन्तर प्रदेशमा भलिबल, फुटबल, क्रिकेट, बक्सिङ, कराँते, तेक्वान्दो, एथलेटिक्स, ब्याडमिन्टन र पौडी खेललाई समावेश गरिएको छ ।
औपचारिक उद्घाटनको दुई दिन अघिदेखिनै भलिबलका खेलहरु सञ्चालन हुने प्रदेश खेलकुद परिषद बागमतीले जनाएको छ । प्रतियोगिताका अधिकांश खेलहरु भरतपुरमा राखिएको छ । भलिबलको फाइनलसँगै उद्घाटन हुने कार्यक्रम फुटबलको फाइनलसँगै हेटौडामा समापन हुने गरि तालिका बनाईएको छ ।
राष्ट्रिय खेलकुद प्रतियोगिता नहुने वर्षमा आयोजना गर्ने गरि सात प्रदेशले अन्तर प्रदेश खेलकुदको कार्यक्रमको परिकल्पना गरेका हुन् । बागमतीबाट सुरु भएको प्रतियोगिताको दोस्रो संस्करण अर्को प्रदेशले गर्ने समझदारी प्रदेश खेलकुदबीच बनेको छ ।
प्रदेशका खेल र खेलाडीलाई प्रबद्र्धन गर्ने उद्धेश्य सहित सात वटा प्रदेशले आपसी सहमतीमा अन्तर प्रदेश राष्ट्रिय खेलकुद प्रतियोगिताको सुरुवात गरेका हुन् ।
