पुरानै प्लेईङ सेटलाई निरन्तरता

काठमाडौं । नेपालले वाफ वुमन्स च्याम्पियनसिपको सेमिफाइनल खेलमा पुरानै प्लेईङ सेटलाई निरन्तरता दिएका छन् । 

नेपालले प्रतियोगिताको सेमिफाइनलमा लेवनानसँग खेल्दैछ ।

नेपालले समूह चरणको अन्तिम खेलमा प्यालेस्टाईनविरुद्धको प्लेईङ सेटलाई सेमिफाइनलमा उतारेको छ ।

मुख्य प्रशिक्षक राजेन्द्र तामाङले एन्जिला सुब्बाको कप्तानीमा पुजा राना, अमृता जैशी, हिरा भुजेल, सावित्रा भण्डारी, अनिता बस्नेत, गिता राना, रेखा पौडेल, प्रिति राई, अनिता केसी र अश्मिता कार्कीलाई मौका दिएका छन् ।

नेपाल फिफा वरियताको १ सय ५ औं स्थान र लेवनान १ सय ३४ औंं स्थानमा छ ।

प्रतियोगितामा नेपाल अपराजित छ । उसले समूह चरणका तीन वटै खेलमा शानदार जित निकालेको थियो । 

पहिलो खेलमा सिरियालाई ४–१ ले हराएको नेपालले दोस्रो खेलमा इराकविरुद्ध ५–० को शानदार जित निकालेको थियो । तेस्रो खेलमा नेपालले प्यालेस्टाइनलाई ४–० ले हराएको थियो ।

नेपाल समूह विजेताको रुपमा सेमिफाइनल प्रवेश गरेको हो । नेपालले समूह एको उपविजेताको रुपमा लेवनानलाई प्रतिद्धन्दीको रुपमा पाएको हो ।