भारतसँग खेल्ने नेपालको सुरुआती-११ सार्वजनिक

काठमाडौं । १४ औं संस्करणको साफ च्याम्पियनसिप फुटबल अन्तर्गत आयोजक भारतसँग खेल्ने नेपालको सुरुआती-११ सार्वजनिक भएको छ ।

मुख्य प्रशिक्षक अल्बर्टो भिन्सेन्जो एनीसले किरण चेम्जोङको कप्तानीमा भारतसँग खेल्ने सुरुआती-११ सार्वजनिक गरेका हुन् ।

अघिल्लो खेलमा सुरुआती-११ मा रहेका पुजन उपरकोटी, नवयुग श्रेष्ठ र विमल पाण्डे बेन्चमा रहेका छन् । उनीहरुको स्थानमा विमल घर्ति मगर, आयुष घलान र देवेन्द्र तामाङले सुरुआती-११ मा स्थान बनाएका छन् । 

बैंगलोरस्थित श्री कांतिराव स्टेडियममा हुने नेपाल र भारतबीचको खेल नेपाली समय अनुसार साँझ ७:४५ बजे सुरु हुनेछ ।

नेपाल आज भारतलाई हराएर पहिलो जित निकाल्ने योजनामा रहेको छ । भारत भने लगातार दोस्रो जित निकाल्न चाहन्छ ।

नेपाल साविक उपविजेता हो । भारत भने साविक विजेता हो ।  त्यसैले दुई चिरपरिचित प्रतिद्वन्दीबीचको खेल रोमान्चक हुने अनुमान गरिएको छ ।

पहिलो खेल नेपाल कुवेतसँग ३-१ ले पराजित भएको थियो । भारतले पाकिस्तानलाई ४-० ले हराएको थियो ।

समूह 'ए' मा रहेको नेपाल अंक विहीन रहदै तेस्रो स्थानमा रहेको छ । सेमिफाइनल यात्रा जीवित राख्न नेपाललाई जितको विकल्प छैन ।

भारत ३ अंक जोडेर दोस्रो स्थानमा रहेको छ । भारत नेपाललाई हराएर सेमिफाइनलको यात्रा पक्का गर्न चाहन्छ ।

नेपालले हालसम्म भारतसँग आधिकारिक २३ खेल खेलेको छ । जसमा भारतले १६ खेल जितेको छ । नेपालले दुई खेल जित्दा ५ खेल बराबरीमा सकिएको छ ।

यस संस्करणको साफमा ८ राष्ट्रको सहभागिता रहेको छ।

यस संस्करणको च्याम्पियनसिपमा नेपालसहित आयोजक भारत, बंगलादेश, कुवेत, लेबनान, भुटान, पाकिस्तान, माल्दिभ्सले सहभागिता जनाउने छन् । यस संस्करणमा कुवेत र लेबनानले आमन्त्रित टोलीको रुपमा रहेका छन् ।

नेपालले तेस्रो तथा समूह चरणको अन्तिम खेलमा १२ असारमा पाकिस्तानविरुद्ध खेल्नेछ ।

नेपालको सुरुआती-११

किरण चेम्जोङ, अनन्त तामाङ, लाकेन लिम्बु, एरिक विष्ट,विमल घर्ति मगर,आयुष घलान,अन्जन विष्ट,देवेन्द्र तामाङ,शनिश श्रेष्ठ,मनिष डाँगी,रोहित चन्द