पाकिस्तानलाई हराउँदै कुवेत सेमिफाइनल नजिक
काठमाडौं । आमन्त्रित टोली कुवेत भारतमा जारी १४ औं संस्करणको साफ च्याम्पियनसिपको सेमिफाइनल नजिक पुगेको छ ।
बैंगलोरस्थित श्री कांतिराव स्टेडियममा शनिबार पाकिस्तानलाई ४-० गोल अन्तरले हराउँदै कुवेत अन्तिम चारको नजिक पुगेको हो।
कुवेतको जितमा मुबारक फानिनीले दुई गोल गरे । सुल्तान इनिजी र इद राशिदीले एक एक गोल गरे ।
खेलको दशौँ मिनेटमा इनिजीले गोल गर्दै कुवेतलाई सुरुआती अग्रता दिलाएका थिए ।
१७ औं मिनेटमा फानिनीले गोल गर्दै कुवेतको अग्रता २-० को बनाए ।
पहिलो हाफको इन्जुरी समयमा फानिनीले व्यक्तिगत दोस्रो गोल गर्दै कुवेतलाई ३-० को अग्रता दिलाए ।
त्यसपछि खेलको ६९ औं मिनेटमा राशिदीले गोल गर्दै कुवेतलाई ४-० को जित दिलाए ।
जितसँगै समूह 'ए' को कुवेतले दुई खेलमा ६ अंक जोडेको छ । कुवेत शीर्ष स्थानमा उक्लिएको छ ।
पहिलो खेलमा कुवेतले नेपाललाई ३-१ ले हराएको थियो ।
पाकिस्तानको यो लगातार दोस्रो हार हो ।
पाकिस्तान दुई खेलमा अंक विहीन रहेर पुछारमा रहेको छ ।
