चेन्नाईको दोस्रो जित,मुम्बई दुई खेलमा जित बिहिन

काठमाडौं । चेन्नई सुपर किंग्सले इन्डियन प्रिमियर लिग (आईपीएल) २०२३ मा दोस्रो जित हात पारेको छ । 

तेस्रो खेलमा दोस्रो जित निकाल्ने क्रममा चेन्नाईले मुम्बई इन्डियन्समाथि ७ विकेटको सानदार जित हात पारेको छ । मुम्बईको यो लगातार दोस्रो हार हो ।

मुम्बईले दिएको १ सय ५८ रनको लक्ष्य चेन्नईले १८ दशमलब १ ओभरमा ३ विकेट गुमाउँदै पूरा गर्यो । 

चेन्नईका लागि अजिक्या रहाणेले २७ बलमा ७ चौका र ३ छक्कासहित ६१ रनको अर्धशतकीय इनिङ खेले । उनले १९ बलमा अर्धशतक पूरा गरेका थिए ।

ओपनर ऋतुराज गायकवाडले ३६ बलमा ४० रन बनाए । दोस्रो विकेटका लागि ऋतुराज गायकवाड र रहाणेले ८२ रनको साझेदारी गरेका थिए ।

शिवम दुबे २६ बलमा २८ तथा अम्बाती रायुडू २० रनमा अविजित रहे । 

मुम्बईका लागि जेसन बेहरनडोफ, पियुष चवला र कुमार कार्तिकेले समान १/१ विकेट लिए ।

त्यसअघि टस हारेर पहिला ब्याटिङको गरेको मुम्बईले २० ओभरमा ८ विकेट गुमाउँदै १ सय ५७ रन बनाएको थियो । 

मुम्बईका ओपनर ईशान किशनले २१ बलमा ५ चौकासहित ३२ रन बनाउँदा टिम डेविडले २२ बलमा ३१ रन बनाए । 

तिलक बर्माले २२ रन बनाउँदा कप्तान तथा ओपनर रोहित शर्माले १३ बलमा २१ रन बनाए ।

चेन्नईका लागि रविन्द्र जडेजाले ३ तथा मिचेल स्यान्टनर,तुषार देशपान्डेले समान २/२ विकेट लिए । सिसान्डा मंगलाले १ विकेट लिए ।

तेस्रो खेलमा दोस्रो जित हात पारेको चेन्नाई १० टोली सहभागी प्रतियोगिताको चौथो स्थानमा रहेको छ । 

दुई खेलमा अंकबिहिन मुम्बई भने आठौं स्थानमा रहेको छ ।