काठमाडौं । पल्सर सहिद स्मारक 'ए' डिभिजन लिग फुटबलमा विभागीय टिम त्रिभुवन आर्मी क्लबले हिमालयन शेर्पा क्लबलाई पराजित गरेको छ । आइतबार भएको खेलमा आर्मीले हिमालयन शेर्पालाई २ - १ गोल अन्तरले हराएको हो ।
एन्फा कम्प्लेक्स सातदोबाटोमा कप्तान भरत खवास चम्कदै दुई गोल गरेपछि आर्मीले जित निकालेको हो । हिमालयन शेर्पाका उल्रिच सीवीले एक गोल फर्काए ।
पहिलो हाफको ३३ औं मिनेटमा कप्तान भरतको गोलबाट आर्मीले सुरुवाती अग्रता बनाएको थियो । सन्तोष तामाङको कर्नर बलमा भरतले हेड गोल गरेका थिए ।
उपाधि दाबेदार आर्मीले खेलको ८५ औं मिनेटमा भरत कै व्यक्तिगत दोस्रो गोलबाट अग्रता दोब्बर बनायो । दिनेश हेम्जाङको कडा प्रहार हिमालयन शेर्पाका गोलकिपर किशोर गिरीले पन्च गर्दै बाहिर पठाएको रिबाउन्ड बलमा भरतले गोल गरेका थिए ।
त्यसपछि खेलको ८७ औं मिनेटमा हिमालयनका उल्रिच सीवीले एक गोल गरेपनि टोलीको हार टार्न सकेनन् ।
खेलमा आर्मीका कप्तान भरत म्यान अफ दि म्याच चुनिए ।
जितसंगै आर्मी लिगको दोस्रो स्थानमा उक्लिएको छ । आर्मीले पाँच खेलबाट १३ अंक जोडेको छ । आर्मीको यो चौथो जित हो । पराजित हिमालयन शेर्पाको ५ खेलबाट १० अंक छ । शेर्पा छैटौं स्थानमा छ ।
