फ्रेन्ड्सको पहिलो जितमा मछिन्द्र शिकार

काठमाडौं । फ्रेन्ड्स क्लबले पल्सर सहिद स्मारक 'ए' डिभिजन लिग फुटबलमा पहिलो जित दर्ता गरेको छ । आइतबार भएको खेलमा मछिन्द्र क्लबलाई ३ - ० गोल अन्तरले हराउँदै फ्रेन्ड्सले पहिलो जित निकालेको हो ।

एन्फा कम्प्लेक्समा सातदोबाटोमा फ्रेन्ड्सलाई जित दिलाउन फोफाना ब्राहिमान, संजोक महर्जन र अनिल महर्जनले एक एक गोल गरे ।

पहिलो हाफ गोलरहित बराबरीमा सकिएको खेलको ६६ औं मिनेटमा ब्राहिमानले गोल गर्दै फ्रेन्ड्सलाई सुरुवाती अग्रता दिलाएका थिए । खेलको ८४ औं मिनेटमा संजोकले गोल गर्दै फ्रेन्ड्सको अग्रता २ - ० को बनाए । त्यसपछि खेलको इन्जुरी समयमा अनिलले गोल गर्दै फ्रेन्ड्सलाई ३ - ० को जित दिलाए ।

खेलमा फ्रेन्ड्सका कप्तान असिम भुसाल म्यान अफ दि म्याच चुनिए ।

जितसंगै फ्रेन्ड्सले ४ अंक जोडेको छ । र, फ्रेन्ड्स लिगको नवौं स्थानमा उक्लिएको छ । चार खेलपछि फ्रेन्ड्सले पहिलो जित निकालेको हो । यसअघि फ्रेन्ड्सले चार खेलमा तीन हार र एक बराबरी खेलेको थियो ।

मछिन्द्रको लिगमा यो तेस्रो हार हो । मछिन्द्रले पाँच खेलमा मात्र २ अंक जोडेको छ । मछिन्द्रले अघिल्ला ४ खेलमा २ हार र २ बराबरीको नतिजा निकालेको थियो । मछिन्द्र लिगको १२ औं स्थानमा छ ।