काठमाडौं । पल्सर सहिद स्मारक 'ए' डिभिजन लिग फुटबलमा जावलाखेल युथ क्लब र फ्रेन्ड्स क्लबले बराबरी खेल्दै अंक बाडेका छन् । बुधबार भएको खेलमा जावलाखेल र फ्रेन्ड्सले ३-३ गोलको बराबरी खेल्दै अंक बाडेका हुन् ।
एन्फा कम्प्लेक्स सातदोबाटोमा भएको प्रतिस्पर्धात्मक खेलमा जावलाखेलका लागि अरुज सिंह, फाडो फोफाना र सुमन डंगोलले एक एक गोल गरे । फ्रेन्ड्सका विकास लामा, फोफाना ब्राहिमान र धिरज श्रेष्ठले एक एक गोल गरे ।
खेलमा सुरुवाती अग्रता भने फ्रेन्ड्सले बनाएको थियो । खेलको २६ औं मिनेटमा विकास लामाले गोल गर्दै फ्रेन्ड्सलाई १ - ० को अग्रता दिलाए ।
तर, खेलको पहिलो हाफको इन्जुरी समयमा अरुज सिंहले गोल गर्दै जावलाखेललाई १ - १ गोलको बराबरीमा ल्याए ।
दोस्रो हाफमा जावलाखेलले सुरुवाती अग्रता बनायो । खेलको ४७ औं मिनेटमा फोफानाले गोल गर्दै जावलाखेललाई २ - १ को अग्रता दिलाए ।
खेलको ५२ औं मिनेटमा सुमन डंगोलले गोल गर्दै जावलाखेललाई ३ - १ स्थितिमा ल्याए । तर, फ्रेन्ड्स खेलमा फर्कदै बराबरी गर्न सफल भयो ।
खेलको ६८ औं मिनेटमा फ्रेन्ड्सका ब्राहिमानले गोल गर्दै खेल ३ - २ मा ल्याए । त्यसपछि खेलको ८२ औं मिनेटमा फ्रेन्ड्सका धिरजले गोल गर्दै खेल ३ - ३ को बराबरीमा ल्याएका थिए ।
बराबरीसंगै दुवैले टोलीले चार खेलपछि पहिलो १ अंक जोडेका छन् । चार सकिदा जावलाखेल र फ्रेन्ड्सले १ - १ अंक जोडेका छन् ।
जावलाखेल १२ औं स्थानमा रहदाँ फ्रेन्ड्स १३ औं स्थानमा रहेका छन् ।
