प्रिन्स भन्छन्, 'ओलम्पिकको टार्गेट गरिरहेको छु'

काठमाडौं । ब्याडमिन्टनका नयाँ स्टार प्रिन्स दाहालले नवौं राष्ट्रिय खेलकुदमा बुधबार एकल स्पर्धामा स्वर्ण जिते । जुनियर वरियतामा विश्व नम्बर एकसम्म पुगेका प्रिन्सले नवौं राष्ट्रियको स्वर्ण जित्न खासै मेहनत गर्न परेन । फाइनलमा उनले पुलिसका बिष्णु कटवाललाई सहजै २१–१२ र २१–९ ले पाखा लगाए ।

विश्व नम्बर एक वरियतामा पुगेपछि प्रिन्ससँग एउटा ठुलो चुनौती थियो, उनीले कति समयसम्म आफ्नो सर्वश्रेष्ठता जोगाउछन् भनेर । उनी लामो समय नम्बर एकमा बसिरहन त सकेनन् । तर ब्याडमिन्टनको इतिहासमा उनी जुनियर वरियताको नम्बर एक स्थानसम्म पुगेर आफु र नेपाली ब्याडमिन्टनलाई अन्तराष्ट्रिय स्तरसम्म चिनाउन काम गरे ।

नम्बर एकको उपाधि चुमेपछि प्रिन्स अन्तराष्ट्रिय एरिनामा कमै देखिएका थिए । उनले लगातार अंक गुमाउँदै गए । विश्व नम्बर एकसम्म पुगेका प्रिन्स किन अन्तराष्ट्रिय कोर्टमा सेलाए त ? 
‘चोट बोकेको थिए । अभ्यास पनि भएको थिएन । यतिकै खेल्न के जानु भनेर गईन् ।’ राष्ट्रिय प्रतियोगितामा पहिलो स्वर्ण जितेका प्रिन्सले भने ।

प्रिन्सले सातौं संस्करणबाट राष्ट्रिय प्रतियोगिता खेल्न सुरु गरेका थिए । सुरुवातको संस्करणका इभेन्टमा उनी पहिलो, दोस्रो चरणबाट बाहिरिएका थिए । आठौं राष्ट्रियमा उनी कास्यसम्म पुगे । नवौंमा उनलाई रोक्ने कोही भएन । पछिल्ला तीन वर्षमा उनले प्राप्त गरेका उपलब्धि साना छैनन् ।

‘एकदमै खुसी छु । राम्रो ट्रेनिङ गरेको थिए । जित्न पर्छ भन्ने थियो । अन्तराष्ट्रिय रुपमा पनि राम्रो गर्न पर्छ भन्ने छ ।’ प्रिन्सले भने, ‘मलेसियामा अभ्यास गरे । त्यो राष्ट्रिय खेलकुदका लागि पनि थियो । ओलम्पिकका लागि पनि हो ।’

‘मलेसियामा अभ्यास गर्दा राम्रो सहयोग गर्यो । रेगुलर खेल्न र अभ्यास गर्न पाए । अहिले सिनियरतिर फोकस गरिरहेको छु । जुनियरको उमेर नि जान लाग्यो । अब ओलम्पिकको टार्गेट गरिरहेको छु ।’ उनले थपे ।  

नेपाली ब्याडमिन्टन कोर्टका राजकुमार मानिने प्रिन्सले प्राय अधिकांश घरेल प्रतियोगितामा लगातार उपाधि जितिरहेका छन् । त्यसो भए राष्ट्रिय प्रतियोगितामा प्राप्त स्वर्णले के अर्थ राख्छ त ?

‘एकदमै फरक अर्थ राख्छ छ । यो दुई वर्षको एकचोटी हुन्छ । एकदमै ठुलो गेम हो । धेरै पोइन्ट आउछ । यसले अन्तराष्ट्रिय रुपमा पनि सहज हुन्छ ।’ प्रिन्सले भने । 

नेपाली ब्याडमिन्टन कोर्टका स्टाइलिस्ट प्लेयर मानिने प्रिन्सलाई घरेलु खेलकुदमा लामो रेसको घोडा मानिएको छ । ब्याडमिन्टनबाट सानै उमेरमा ठुलो अन्तराष्ट्रिय सफलता हासिल गरेका प्रिन्सले भविष्यलाई कसरी हेरिरहेका छन् त ? 

‘अब सिनियरमा जाने हो । उपाधि जित्ने हो । ओलम्पिकमा केही गर्ने लक्ष्य छ ।’ नेपाल पुलिस क्लबमा भर्खरै एक वर्षको सम्झौता गरेका प्रिन्सले भने ।