अलमुताइरी हटाउन छानविन समितिको सिफारिस

काठमाडौं । फुटबल खेलाडी र प्रशिक्षकको विवाद छानविन गर्न गठित समितिले राष्ट्रिय फुटबल टिमका मुख्य प्रशिक्षक अब्दुल्लाह अलमुताईरीलाई जिम्मेवारीबाट हटाउन सिफारिस गरेको छ । 

अखिल नेपाल फुटबल संघद्धारा गठित तीन सदस्यीय समितिले कतारसँग समन्वय गरेर राष्ट्रिय टिमका वर्तमान मुख्य प्रशिक्षक अलमुताईरीलाई परिवर्तन गर्न सिफारिस गरेको हो । 

खेलाडी प्रशिक्षक विवादको छानविन गर्न एन्फाको कार्यसमिति बैठकले भुतपूर्व राष्ट्रिय खेलाडी तथा नेपाली सेनाका उपरथी भिक्टर राणाको संयोजकत्वमा पूर्व राष्ट्रिय फुटबल खेलाडी विदुर विष्ट र नेपाल राष्ट्रिय तथा अन्तराष्ट्रिय खेलाडी संघका उपाध्यक्ष दीपक थापा सम्मिलित समिति गठन गरेको थियो ।

राष्ट्रिय फुटबल टिमका सिनियर १० खेलाडीले एफसी कप छनोटको बन्द प्रशिक्षण छाडेर बाहिर निस्किएपछि घटना सार्वजनिक भएको थियो । उपकप्तान रोहित चन्द सहितका खेलाडीले प्रशिक्षणको क्रममा राम्रो बस्न र खानको प्रबन्ध गर्न अनुरोध गरेपछि प्रशिक्षक अलमुताईरीले चन्दलाई राष्ट्रिय टिमबाट बाहिर निकालेका थिए । 

रोहितको माग सबै खेलाडीको आवाज रहेको भन्दै सिनियर खेलाडीले उपकप्तानको कुनै गल्ती नरहेको प्रशिक्षकसँग भनेका थिए । खेलाडीले प्रशिक्षणको दौरान राम्रो प्रबन्धका लागि उपकप्तानलाई बोल्नका आफुहरुलेनै आग्रह गरेको धारणा प्रशिक्षकसँग राखेपछि अलमुताईरीले अपशब्द प्रयोग गरि थप सिनियर ९ खेलाडीलाई बन्द प्रशिक्षणबाट निकालेका थिए ।

छानविन समितिले एएफसी कप छनोटको समापनसँगै कतारसँग परामर्श गरेर प्रशिक्षक परिवर्तन गर्न एन्फालाई सुझाव दिएको हो । समितिले प्रशिक्षक आफै अस्वस्थ रहेको बयानको क्रममा बताएको उल्लेख गर्दै वर्तमान प्रशिक्षक अलमुताईरी जिम्मेवारी सम्हाल्न सक्षम नभएको समेत औल्याएको छ । एन्फा स्रोतका अनुसार प्रशिक्षक दायरा भन्दा बाहिर गएर खेलाडीको नीजि जिवनमा हस्तक्षप गरेको प्रतिवेदनमा उल्लेख छ ।  

छानविन समितिले घटनाको मुख्य दोषी व्यवस्थापक रहेको ठहर समेत गरेको छ । घटनाको क्रममा व्यवस्थापक घटना स्थलमा नभएको र जिम्मेवारी समेत बहन गर्न नसकेको उल्लेख गर्दै समितिले राष्ट्रिय टिमको व्यवस्थापक परिवर्तन गर्न सुझाव दिएको छ । 

वर्तमान राष्ट्रिय टिमको व्यवस्थापकमा मधुसुदन उपाध्याय रहेका छन् । व्यवस्थापकको रुपमा भन्दा अलमुताईरीको सहयोगीको रुपमा खटन पटन गरेको भन्दै उनको आलोचना हुने गरेको छ । विवादलाई समयमै निरुपण गर्न नसकेका कारण ठुलो रुप लिएको छानविन प्रतिवेदनले औल्याएको छ । 

समितिले प्रशिक्षकले बारम्बार अमर्यादि शब्द प्रयोग गरेर खेलाडीलाई बन्द प्रशिक्षणबाट निस्कन बाध्य बनाएको समेत प्रतिवेदनमा उल्लेख छ । खेलाडीले संयमता गुमाएर राष्ट्रिय टिमको बन्द प्रशिक्षण छाडेर गल्ती गरेको समितिले ठहर गरेको छ ।