कतार एयरवेज 'ए' डिभिजन लिगको मुख्य प्रायोजक  

काठमाडौं । सहिद स्मारक 'ए' डिभिजन लिग फुटबललाई पुन : कतार एयरवेजले प्रायोजन गरेको छ ।

अखिल नेपाल फुटबल संघ (एन्फा) ले बुधबार कतार एयरवेजसँग मुख्य प्रायोजक सम्झौतामा हस्ताक्षर गरेको छ ।

एन्फाका अध्यक्ष कर्मा छिरिङ शेर्पा र कतार एयरवेजका कन्ट्री म्यानेजर मोहम्मद इल इमानले सम्झौता पत्रमा हस्ताक्षर गरे ।

एन्फाले एक वर्षको लागि कतार एयरवेजसँग १ लाख ५० हजार अमेरिकी डलरको सम्झौता गरेको हो ।

कतार एयरवेजले अघिल्लो पटकको लिगमा समेत मुख्य प्रायोजकको रुपमा प्रायोजन गरेको थियो ।

सम्झौतापछि बोल्दै कतार एयरवेजका मोहम्मदले नेपाली फुटबलको विकासका लागि प्रायोजन गरिएको बताए ।

'कतार एयरवेज स्पोर्टसको ठूलो एडभोकेट गर्ने संस्था हो । यो सम्झौता भनेको नेपाली फुटबल विकासका लागि हाम्रो प्रतिवद्धता हो,' उनले भने, 'हामीले एन्फा जस्तै पेरिस सेन्ट जर्मेन र वायर्न म्युनिखसँग पनि सम्झौता गरेका छौ । हामी नेपाली फुटबलको विकासका लागि सहयोग गर्न पाएकोमा खुशी छौ ।'

अध्यक्ष शेर्पाले कतार एयरवेजसँगको सम्झौता नवीकरण गर्न पाएकोमा खुशी व्यक्त गरे।

'आज एउटा खुशीको दिन किनभने कतार एयरवेजसँग फेरि हामीले सम्झौता नवीकरण गर्ने मौका पाएका छौँ,' अध्यक्ष शेर्पाले भने, 'कतार एयरवेजलाई म धन्यवाद दिन चाहन्छु ।'

यस पटकको शीर्ष डिभिजन लिग शुक्रबारबाट सुरु हुनेछ ।

त्रिपुरेश्वरस्थित दशरथ रंगशालामा हुने उद्घाटन खेलमा सातदोबाटो युथ क्लब र फ्रेन्ड्स क्लबबीच प्रतिस्पर्धा हुनेछ ।

उद्घाटन खेल फ्लड लाइटमा खेलाईने छ । उक्त खेल अपरान्ह ४:४५ बजे सुरु हुनेछ । दोस्रो दिनबाट हरेक दिन दुई खेलहरु हुने छन् ।

कुल ९१ खेल हुने लिगमा 'ए' डिभिजनका १४ क्लबले प्रतिस्पर्धा गर्ने छन् ।

यस पटकको लिगको पुछारका दुई टिम रेलिगेसनमा पर्दै 'बी' डिभिजनमा झर्ने छन् ।

अघिल्लो सिजनको उपाधि मछिन्द्र क्लबले जितेको थियो ।

यस पटकको लिग विजेताले ७५ लाख पाउने छन् ।

यस्तै उपविजेताले ५० लाख प्राप्त गर्दा तेस्रो हुनेले २५ लाख पाउने छन् ।

हरेक खेलको विजेताले ५० हजार पाउने छन् । खेल बराबरीमा सकिए दुबै टोलीले २५/२५ हजार पाउने छन् ।