एन्फाको पूर्व प्राविधिक निर्देशक होल्गरको निधन

काठमाडौं । नेपाली राष्ट्रिय फुटबल टिमका पूर्व प्राविधिक निर्देशक होल्गर ओभरम्यानको निधन भएको छ  ।

जर्मन नागरिक ओभरम्यानको ८५ वर्षको उमेरमा जर्मनीमा निधन भएको हो ।

अखिल नेपाल फुटबल संघ (एन्फा) का पूर्व अध्यक्ष गणेश थापाले ओभरम्यानको निधन भएको जनाएको छ ।

अफगानिस्तानको पूर्व प्रशिक्षक समेत रहेका ओभरम्यानले सन् १९९० देखी १९९५ सम्म प्राविधिक निर्देशकका रुपमा काम गरेका थिए।

प्राविधिक निर्देशकको रूपमा ओभरम्यानले नेपालको १२ स्थानमा फुटबल उत्सव सञ्चालन गरेर २ सय खेलाडी छनोट गरेका थिए ।

उनले हरि खड्का, उपेन्द्रमानसिंह र राजीव नेपालीलाई जर्मनीमा दुई महिना प्रशिक्षण दिलाएका थिए ।  

ओभरम्यानले नेपाललाई दोस्रो घर मान्दै आएका थिए । उनी पटक पटक नेपाल आउने गरेका थिए ।