बंगलादेशसँग रोकियो भारत

काठमाडौं । माल्दिभ्समा जारी १३ औं संस्करणको साफ च्याम्पियनसिप फुटबलमा उपाधि दाबेदार  भारत बराबरीमा रोकिएको छ ।

सोमबार भएको खेलमा भारत बंगलादेशसँग १-१ गोलको बराबरीमा रोकिएको हो ।

मालेस्थित राष्ट्रिय फुटबल स्टेडियममा सुरुआती अग्रता जोगाउन नसक्दा भारत रोकिएको हो ।

खेलको २६ औं मिनेटमा सुनिल क्षेत्रीले गोल गर्दै भारतलाई सुरुआती अग्रता दिलाएका थिए ।

तर, खेलको ७४ औं मिनेटमा यसीन अराफतले गोल गर्दै बंगलादेशलाई हारबाट जोगाए ।

यस्तै खेलको ५४ औं मिनेटमा डिफेन्डर विश्वनाथ घोसले रातो कार्ड पाएपछि बंगलादेश १० खेलाडीमा समेटिएको थियो ।

यस बराबरीसँगै बंगलादेशले २ खेलमा ४ अंक जोडेको छ । बंगलादेश शीर्ष स्थानमा रहेको छ ।

बंगलादेशले पहिलो खेलमा श्रीलंकालाई हराएको थियो ।

भारतले भने बराबरीबाट प्रतियोगिताको सुरुआत गरेको छ ।