एएफसीसँग केल्मीको सहकार्य

काठमाडौं । स्पेनको खेल सामग्री उत्पादक कम्पनी केल्मी र एसियन फुटबल कन्फेडेरेसन(एएफसी)बीच सहकार्य भएको छ ।

केल्मी र एएफसीबीच मंगलबार तीन वर्षको लागि सम्झौता भएको छ । राष्ट्रिय टिम सहभागी हुने एएफसीको प्रतियोगिताको ग्लोबल सपोर्टरको रुपमा केल्मी एएफसीसँग जोडिएको हो ।

सम्झौतासँगै एएफसीको विभिन्न प्रतियोगितामा आवश्यक खेल सामग्री एएफसीलाई उपलब्ध गराउने छ ।

सन् २०२३ मा चीनमा आयोजना हुने एएफसी एसिया कप प्रतियोगितामा केल्मीको बल प्रयोग गरिनेछ ।

यस्तै विश्वकप छनोट अन्तर्गत एसिया छनोटको खेल, चीनमा हुने एएफसी एसियन कप, भारतमा हुने एएफसी महिला एसियन कप र उज्वेकिस्तानमा हुने एएफसी यू-२३ एसियन कपमा केल्मी र एएफसीबीच सहकार्य हुनेछ ।

विश्व चर्चित ब्राण्ड केल्मीले ६० वर्षबाट खेल सामग्री उत्पादन गरिरहेको छ । केल्मीले स्पेनको ला लिगा र दोस्रो डिभिजनका विभिन्न क्लबलाई प्रायोजन गरेको छ । यस्तै प्रिमियर लिग क्लब, रसियन लिग क्लब र चिनियाँ लिगसँग सहकार्य गर्दै आईरहेको छ  ।

केल्मीले नेपालको फुटबल टिमलाई प्रायोजन गरिसकेको छ । केल्मी नेपाली भलिबल टिमको प्रायोजक समेत हो ।