मेरो नाममा नखेल्नु : रोनाल्डो

काठमाडौं । क्रिस्टियानो रोनाल्डो अहिले पनि लगातार चर्चामा छन् र त्यसको कारण हो, उनको सम्भावित ट्रान्सफर । यी पोर्चुगाली खेलाडी कहिले रियल मड्रिडसँग जोडिन्छ भने कहिले म्यानचेस्टर युनाइटेडसँग । यी दुवै उनका पुराना क्लब हुन् । यी सबै हल्लाका कारण रोनाल्डोलाई भने एक प्रकारले रिस उठेको छ, दिक्क छन् ।

त्यसैले उनको भनाइ अगाडि आएको छ, भन्छन्, ‘जे जतिले मलाई चिन्छन्, सबैलाई थाहा छ, म आफ्नो काममा कति धेरै केन्द्रित हुने गर्छुं । म कम कुरा गर्छुं । धेरै काम गर्छुं । यो नै मेरो खेल जीवनको सुरुदेखि नीति रहेको छ । तर पछिल्लो समय सबै मेरो नाम लिएर कुरा गरिरहेका छन्, त्यसैले मलाई आफ्नो स्थितिबारे बोल्नु नै छ ।’

उनले इन्स्ट्राग्राममा लेखेका छन्, ‘मेरोबारे धेरै हल्ला गर्नु भनेको खेलाडीका रूपमा मेरो अपहेलना नै हौ ।’ उनले रियल जाने सबै प्रकारको हल्लालाई अस्विकार गरेका छन् । उनले रियलमा आफ्नो कथा लेखिसकेको र आफू प्रत्येक रियलका समर्थकको मनमा रहेको पनि दाबी गरेका छन् । उनले आफू एक भन्दा बढी लिगका एक भन्दा बढी क्लबमा जानेलाई पनि हल्ला नै भने ।

रोनाल्डोले अन्त्यमा लेखेका छन्, ‘त्यसैले अहिले म आफ्नो मौनता तोड्दै छुं । कसैलाई पनि मेरो नाममा खेल्ने अधिकार छैन् र म दिन्न पनि । म आफ्नो खेल जीवन र काममै केन्द्रित हुन चाहन्छुं । म अब आउने सबै चुनौती पनि डटेर सामना गर्न चाहन्छुं । अन्य सबै बेकार हुन् र खालि हल्ला मात्र हुन् ।’