काठमाडौं । जापानमा जारी टोकियो ओलम्पिक अन्तर्गत आज (शुक्रबार) नेपालकी एथलेटिक्स खेलाडी सरस्वती चौधरीले प्रतिस्पर्धा गर्दैछिन् ।
ओलम्पिक स्टेडियमको ट्रयाकमा सरस्वतीले महिलाको १ सय मिटर दौडमा प्रतिस्पर्धा गर्ने छिन् ।
सरस्वतीको प्रतिस्पर्धा नेपाली समय अनुसार बिहान ५ बजेर ५२ मिनेटमा सुरु हुनेछ ।
सरस्वती दोस्रो हिटमा रहेकी छिन् । उनको हिटमा ९ खेलाडी रहेकी छिन् । यस हिटको शीर्ष तीन खेलाडी दोस्रो चरणमा पुग्ने छन् ।
सरस्वती राष्ट्रिय कीर्तिमान बनाउने योजनामा रहेकी छिन् । यस स्पर्धामा सरस्वतीको उत्कृष्ट समय १२.५५ सकेन्ड हो ।
यस स्पर्धामा देवीमाया पनेरुको नाममा राष्ट्रिय कीर्तिमान रहेको छ । सन् १९९९ को साग गेम्समा पनेरुले १२.२० सकेन्डको कीर्तिमान बनाएकी थिइन् ।
टोकियो ओलम्पिक्समा नेपालबाट पाँच खेलाडी सहभागी भएका छन् । जसमा चार जनाको प्रतिस्पर्धा सकिसकेको छ ।
टोकियो ओलम्पिकमा सरस्वती नेपालको अन्तिम प्रतिस्पर्धी हुन् ।
