हिमालयन शेर्पाको प्रशिक्षकमा युगल किशोर

काठमाडौं । ए डिभिजन क्लब हिमालयन शेर्पाले मुख्य प्रशिक्षक युगल किशोर राईलाई अनुबन्धन गरेको छ ।

क्लबले नयाँ सिजनको लिगका लागि राईलाई मुख्य प्रशिक्षकको जिम्मेवारी दिने निर्णय गरेको हो ।

शेर्पा क्लबले मुख्य प्रशिक्षकमा युगललाई अनुबन्धन गर्दै डिफेण्डर उर्लिच सिवाइ राम्जीसंगको सम्झौता नविकरण गरेको छ ।

ए लाईसेन्स प्राप्त प्रशिक्षक युगल किशोरले पहिलो पटक ए डिभिजन क्लबमा काम गर्न लागेका हुन् ।

युगलले गत महिना सम्पन्न फ्रेन्चाईज फुटबल प्रतियोगिता नेपाल सुपर लिग (एनएसएल)मा धनगढी एफसीको मुख्य प्रशिक्षकको जिम्मेवारी सम्हालेका थिए ।

पछिल्लो पटक बी डिभिजन लिग हेरेका राईले पहिलो पटक ए डिभिजन क्लब समाल्ने अवसर पाएका हुन् ।

युगलले आरसिटी, नेपाल पुलिस क्लबबाट ए डिभिजन लिग खेलिसकेका छन् । उनले गत बर्ष नेपालमै भएको एएफसी ए लाईसेन्स कोर्ष उत्तिर्ण गरेका थिए ।

‘यस वर्षको लिगका लागि राम्जी र प्रशिक्षकमा युगल किशोरलाई अनुबन्धन गरेका छौं ।’ क्लबका एक अधिकारीले भने ।

राम्जीले पछिल्लो संस्करणको ए डिभिजन लिग समेत शेर्पा क्लबबाट खेलेका थिए । यस बर्ष समेत शेर्पा क्लबमै रहने गरि क्यामरुनी खेलाडी राम्जीले सम्झौता नविकरण गरेका हुन् ।

राम्जीले पहिलो संस्करणको फ्रेन्चाईज फुटबल एनएसएलमा विराटनगर सिटी एफसीबाट खेलेका थिए । विराटनगरको सेन्टर डिफेन्स सम्हालेका उनले ६ खेलमा पुरै समय मैदान बिताएका थिए ।

क्लबले खेलाडी र प्रशिक्षकको सम्झौता एक बर्षको भएपनि रकम भने खुलाएको छैन ।

कोरोना महामारीका कारण गत वर्ष ए डिभिजन लिग हुन सकेन । तर यस वर्ष एन्फाले वार्षिक क्यालेन्डरमा लिग गर्ने तालिका प्रस्तुत गर्दैै तयारी अघि बढाएको छ । यस वर्षको ए डिभिजन लिगका लागि क्लबहरुले समेत खेलाडी अनुबन्धन गर्ने काम सुरु गरेका छन् ।