पोल्याण्डलाई लेवान्डोस्कीको साथ

एजेन्सी । युरोपको विभिन्न ११ शहरमा जारी १६ औं संस्करणको युरोकप फुटबल अन्तर्गत आज (सोमबार) हुने दोस्रो खेलमा पोल्याण्ड र स्लोभाकियाबीच प्रतिस्पर्धा हुँदैछ ।

समूह 'इ’ मा रहेको पोल्याण्ड र स्लोभाकियाबीचको खेल नेपाली समय अनुसार राति ९:४५बजे सुरु हुनेछ । आज पोल्याण्ड र स्लोभाकिया जित निकाल्दै सुखद सुरुवात गर्न चाहन्छ ।

पोल्याण्डले सन् १९८० यता ८ ठुला प्रतियोगितामा खेलिसकेको छ । जसमा एक मात्रै जित हासिल गरेको छ । त्यो थियो अन्तिम युरोकपमा उत्तरी आयरल्याण्डविरुद्ध । त्यसैले पहिलो खेलमा पोल्याण्ड यसको सुधारमा हुनेछ ।

यता, स्लोभाकिया समेत पोल्याण्डका प्रभावशाली स्ट्राइकर रोबर्ट लेवान्डोस्कीसँग सतर्क रहनेछ । पछिल्लो समय क्लब फुटबलमा लेवान्डोस्कीको प्रदर्शन उच्च रहेको छ । दुई टोली ठुला प्रतियोगितामा पहिलो पटक खेल्न लागेका हुन् ।

प्लेयर्स टु वाच -

रोबर्ट लेवान्डोस्की– पोल्याण्ड

युरोपको क्लब फुटबलमा पछिल्लो समय प्रभावशाली प्रदर्शन गरिरहेका खेलाडी हुन् लेवान्डोस्की।  लेवान्डोस्की बुन्डेसलिगा क्लब बायर्न म्युनिखबाट खेल्ने गर्छन् । उनले क्लब तथा राष्ट्रिय टोलीबाट ५०० गोल पूरा गरिसकेका छन् ।

उनीसँग बोरुसिया डर्टमण्डबाट खेलेको अनुभव समेत रहेको छ । लेवान्डोस्की पोल्याण्डको यू-१९ र २१ टोलीबाट समेत खेलेका छन् । राष्ट्रिय टोलीबाट उनले १ सय १९ खेल खेल्दै ६६ गोल गरेका छन् ।

लेवान्डोस्कीले सन् २००८ मा २० वर्षको उमेरमा सान मारियोविरुद्ध डेब्यु गरेका थिए । लेवान्डोस्कीले ठुला १० खेलमा मात्र १ गोल गरेका छन् । सन् २०१६ को युरोकपमा पोर्चुगलविरुद्ध गोल गरेपछि उनी गोलविहिन रहँदै आएका छन् ।

गत सिजन उनले बुन्डेसलिगामा गोल्डेन बुट जितेका थिए ।

मारेक हाम्सिक – स्लोभाकिया

हाम्सिक स्लोभाकियाका कप्तान तथा मिडफिल्डर हुन् । स्लोभाक अट्याकिङ मिडफिल्डर हाम्सिक स्विडिस क्लब आईएफके गोटबर्कबाट व्यवसायिक फुटबल खेल्ने गर्छन् ।

मिडलाइनमा बल होल्ड गर्न, लामा प्रहार गर्न, विपक्षी डिफेन्डरलाई सहजै बिट गर्न माहिर छन् । ३३ वर्षीय हाम्सिकसँग सिरी 'ए' क्लब नापोली, चाईनीज सुपर लिग क्लब डालियनबाट खेलेको अनुभव समेत रहेको छ ।

उनले स्लोभाकीयाको यू–१७, १९, २१ बाट खेलेका छन् । यस्तै राष्ट्रिय टोलीबाट १ सय २६ खेल खेल्दा २६ गोल समेत गरेका छन् ।