युभेन्ट्सको जितमा रोनाल्डो नायक

एजेन्सी । इटालियन सिरी 'ए' फुटबलमा युभेन्ट्सले जित निकालेको छ ।

आइतबार रति भएको खेलमा युभेन्ट्सले उडिनेजेलाई २-१ गोल अन्तरले पराजित गरेको छ ।

क्रिस्टियानो रोनाल्डो चम्किएपछि युभेन्ट्सले उत्कृष्ट पुनरागमन गर्दै जित निकालेको हो ।

खेलको १० औं मिनेटमा मोलिनाले गोल गर्दै उडिनेजेलाई सुरुवाती अग्रता दिलाएका थिए ।

तर, दोस्रो हाफको अन्तिम १० मिनेटभित्र युभेन्ट्सले दुई गोल फर्कायो ।

खेलको ८३ औं मिनेटमा रोनाल्डोले पेनाल्टीमा गोल गर्दै युभेन्ट्सलाई १-१ गोलको बराबरीमा फर्काए ।

त्यसपछि खेलको ८९ औं मिनेटमा रोनाल्डोले व्यक्तिगत दोस्रो गोल गर्दै युभेन्ट्सलाई २-१ को जित दिलाए ।

जितसँगै युभेन्ट्सले ३४ खेलमा ६९ अंक जोडेको छ । युभेन्ट्स तेस्रो स्थानमा रहेको छ ।

उडिनेजे ३९ अंक जोडेर ११ औं स्थानमा रहेको छ ।