ललितपुरद्वारा प्रशिक्षक हुमागाई बर्खास्त

काठमाडौं । फ्रेन्चाईज फुटबल प्रतियोगिता नेपाल सुपर लिग (एनएसएल) को टिम ललितपुर सिटी एफसीले मुख्य प्रशिक्षक प्रदिप हुमागाईलाई बर्खास्त गरेको छ ।

प्रतियोगितामा टिमले खराब प्रदर्शन कायम राखेपछि ललितपुरले मुख्य प्रशिक्षक हुमागाईलाई बर्खास्त गरेको हो ।

ललितपुरले हुमागाईलाई बर्खास्त गरिएको जानकारी दिदै टिम हेर्ने जिम्मेवारी सहायक प्रशिक्षक राजु तामाङलाई दिईएको जनाएको छ ।

त्रिपुरेश्वरस्थित दशरथ रंगशालामा आइतबार ललितपुरले पोखरा थन्डर्ससँग गोलरहित बराबरी खेलेको थियो ।

प्रतियोगितमा ललितपुरले जित निकाल्न सकेको छैन ।

ललितपुर ४ खेलमा ३ अंक जोडेर छैटौं स्थानमा रहेको छ ।

पहिलो खेलमा ललितपुर काठमाडौंसँग १-० ले पराजित भएको थियो ।

दोस्रो खेलमा चितवनसँग १-१ को बराबरी खेलेको ललितपुरले तेस्रो खेलमा धनगढीसँग १-१ कै बराबरी खेलेको थियो ।