मासन टोटेनहमको अन्तरिम प्रशिक्षक
एजेन्सी । प्रिमियर लिग क्लब टोटेनहमले रायन मासनलाई अन्तरिम प्रशिक्षक चयन गरेको छ ।
मुख्य प्रशिक्षक जोसे मोरिन्होलाई बर्खास्त गरेको दोस्रो दिन टोटेनहमले अन्तरिम प्रशिक्षक चयन गरेको हो ।
टोटेनहमले यस सिजनको अन्तिमसम्मका लागि मासनलाई अन्तरिम प्रशिक्षक चयन गरिएको जनाएको छ ।
पूर्व मिडफिल्डर समेत रहेका २९ वर्षीय मासनले क्लबको एकेडमीमा काम गरिरहेका थिए ।
मासनले सन् २०१८ मा फुटबलबाट सन्यास लिएका थिए ।
क्लबले यस सिजन खराब प्रदर्शनलाई निरन्तरता दिएपछि टोटेनहमले सोमबार मोरिन्होलाई बर्खास्त गरेको हो ।
टोटेनहमले मुख्य प्रशिक्षक माउरिसियो पोचेटिनोलाई बर्खास्त गर्दै मोरिन्होलाई प्रशिक्षक नियुक्त गरेको थियो ।
चेल्सी र म्यानचेस्टर युनाइटेडका पूर्व प्रशिक्षक समेत रहेका मोरिन्होले टोटेनहमसँग सन् २०२३ सम्मको लागि सम्झौता गरेका थिए ।
तर, पोर्चुगिज प्रशिक्षक मोरिन्हो १७ महिनापछि नै बर्खास्तमा परेको हो ।
यस सिजन टोटेनहम लिगको सातौं स्थानमा रहेको छ ।
