एजेन्सी । घरेलु टिम न्युजिल्याण्डले बंगलादेशविरुद्धको तीन खेलको टी-ट्वान्टी क्रिकेट सिरिजमा क्लिन स्विप गरेको छ ।
अकल्याण्डमा बिहीबार भएको तेस्रो तथा अन्तिम खेलमा बंगलादेशलाई ६५ रनले पराजित गर्दै न्युजिल्याण्डले सिरिज ३-० ले आफ्नो बनाएको हो ।
वर्षाको कारण १० ओभरमा झारिएको खेलमा न्युजिल्याण्डले पहिले ब्याटिङ गर्दै ४ विकेट गुमाएर १ सय ४१ रन बनाएको थियो । न्युजिल्याण्डका लागि फिन एलेनले ७१ रनको अर्धशतकीय इनिङ्स खेले ।
यस्तै मार्टिन गुप्टिलले ४४ रन जोड्दा ग्लेन फिलिप्सले १४ रन बनाए । बंगलादेशका ताक्सिन अहमेद,शोरिफुल इस्लाम र मेहदी हसनले १/१ विकेट लिए ।
न्युजिल्याण्डले दिएको १ सय ४२ रनको लक्ष्यसहित जवाफी ब्याटिङ गरेको बंगलादेश ९ ओभर ३ बलमा अलआउट हुँदै ७६ रनमा समेटियो ।
बंगलादेशका मोहमद नाइमले १९ रन जोड्दा मोसडेक होसेनले १३ रन बनाए । सौम्य सरकारले १० रन बनाउँदा अन्य ब्याट्सम्यानले दोहोरो अंक जोड्न सकेनन् ।
न्युजिल्याण्डका टोड एट्स्लेले ४ तथा टिम साउथीले ३ विकेट लिए ।
