थ्री नेसन्स कप : बंगलादेशको विजयी सुरुवात

काठमाडौं । थ्री नेसन्स कप अन्तराष्ट्रिय फुटबलमा बंगलादेशले विजयी सुरुवात गरेको छ ।

त्रिपुरेश्वरस्थित दशरथ रंगशालामा मंगलबार किर्गिस्तानको यू-२३ टिमलाई १-० ले पराजित गर्दै बंगलादेशले सुखद सुरुवात गरेको हो ।

बंगलादेशको जितमा आत्मघाती गोल निर्णायक बन्यो । किर्गिस्तानको कुमारवज उलु बैमानले आत्मघाती गोल गरे ।

खेलको ३० औं मिनेटमा बंगलादेशका मोहमद साद उडिनको क्रस क्लियर गर्ने क्रममा उनले आफ्नै पोस्टमा गोल गरे ।

खेलको इन्जुरी समयमा किर्गिस्तानले गोलको अवसर पाएको थियो । तर, टासेभ कामुलिद्दीनले पोस्ट नजिकबाट फ्री हेडमा गोल गर्न सकेनन् । उनको प्रहार आकाशिएको थियो । 

खेलमा बंगलादेशका सोहेल राना म्यान अफ दि म्याच चुनिए ।

यससँगै बंगलादेशले पहिलो पटक किर्गिस्तानको उमेर समूहको टिमलाई हराउँन सफल भएको छ ।

यस अघि दुई देशको राष्ट्रिय टिमबीच भएको चार भेटमा भने किर्गिस्तानले जित हासिल गरेको थियो ।

जितसँगै बंगलादेशले महत्वपूर्ण ३ अंक जोडेको छ । र, फाइनल पुग्ने सम्भावना बलियो बनाएको छ ।

बंगलादेशका मुख्य प्रशिक्षक जेमी डेले यस जित खेलाडीको लागि महत्वपूर्ण भएको बताए ।

'हामीले राम्रो खेल्यौं र जित हासिल गर्यौं । खेलाडीका लागि पहिलो जित महत्वपूर्ण हुन्छ,' जेमीले भने, 'नयाँ खेलाडीको परिक्षण पनि राम्रो भयो । हामीले नयाँ खेलाडीलाई विश्वकपका लागि हेरेका थियौं ।'

यस्तै म्यान अफ दि म्याच बनेका सोहेल रानाले यस जितले अर्को खेलका लागि आत्मबल बढेको बताए ।

'हामीले पहिलो खेल जित्यौं । यस जितले अर्को खेलका लागि थप बिश्वास बढाएको छ,' उनले भने ।

किर्गिस्तानका मुख्य प्रशिक्षक झोल्डोसोभ नुर्बेकले पहिलो हाफमा खेलाडीबीच तालमेल नमिलेको बताए ।

'मेरा खेलाडीले अनुभवी खेलाडीसँग खेले । तर, पहिलो हाफमा खेलाडीमा केही कन्फ्युजन देखियो । दोस्रो हाफमा राम्रो खेल्यौं,' उनले भने, 'हामीले गोलको अवसर सिर्जना गर्न सकेनौं । खेलाडीमा आत्मविश्वासको कमी देखियो ।'

अखिल नेपाल फुटबल संघ (एन्फा) ले आयोजना गरेको थ्री नेसन्स कपमा नेपाल, बंगलादेश र किर्गिस्तानको सहभागिता रहेको छ ।

नेपालले पहिलो खेलमा बिहीबार किर्गिस्तानसँग खेल्नेछ ।

दोस्रो खेलमा नेपालले बंगलादेशसँग खेल्नेछ । नेपाल र बंगलादेशबीचको खेल चैत १४ गते हुनेछ ।

राउण्ड रोबिनको आधारमा हुने लिगको शीर्ष दुई टिमले फाइनलमा प्रतिस्पर्धा गर्ने छन् ।

फाइनल खेल चैत १६ गते हुनेछ ।