'उत्कृष्ट प्रदर्शनको प्रयास गर्छौं'

काठमाडौं । नेपाली राष्ट्रिय फुटबल टिमका मुख्य प्रशिक्षक बाल गोपाल महर्जनले त्रिदेशीय अन्तराष्ट्रिय फुटबल प्रतियोगितामा उत्कृष्ट प्रदर्शनका लागि प्रयास गर्ने बताएका छन् ।

सोमबार आयोजित प्रि-म्याच कन्फरेन्समा बोल्दै प्रशिक्षक महर्जनले घरेलु मैदानमा हुने प्रतियोगितामा उत्कृष्ट प्रदर्शनका लागि प्रयास गर्ने बताएका हुन् ।

मुख्य प्रशिक्षक महर्जनले उत्कृष्ट प्रदर्शन गर्न सफल भएका नतिजा समेत त्यहिँ अनुसार आउने बताए ।

'टोलीका सबै खेलाडी फिट छन्, एक दुई जना बाहेक । टिम राम्रो बनेको छ । अहिले जित्छौं भन्दा पनि राम्रो प्रदर्शन गर्ने प्रयास गर्ने छौँ,' प्रशिक्षक महर्जनले भने, 'राम्रो प्रदर्शन गरे आफै नतिजा आफ्नो पक्षमा आउँछ ।'

दशरथ रंगशालामा आयोजना हुने त्रिदेशीय फुटबलमा नेपाल, बंगलादेश र किर्गिस्तानले खेल्ने छन् ।

भोलि (मंगलबार) हुने उद्घाटन खेलमा किर्गिस्तान र बंगलादेश खेल्ने छन् ।

नेपालले पहिलो खेलमा किर्गिस्तानसँग खेल्नेछ । किर्गिस्तानको यू-२३ टिम हुनेछ ।

मुख्य प्रशिक्षक महर्जनले किर्गिस्तान र बंगलादेशबीचको उद्घाटन खेल हेरेर टिमको रणनीति तयार गर्ने बताए ।

'हामीले विश्वकप छनोटका लागि तयारी गरिरहेका थियौं । यस अघिको मैत्रीपूर्णमा तयारी पुगेको थिएन । जसको कारण नतिजा त्यस्तै आयो । टिममा मुख्य ८ खेलाडी समेत थिएन । भोलिको खेल हेरेर हामी हाम्रो रणनीति बनाउने छौँ,' महर्जनले भने ।

मुख्य प्रशिक्षक महर्जनले टिमको कप्तानी किरण चेम्जोङले गर्ने बताए । किरण आज नेपाल आईपुग्ने उनले बताए ।

यस्तै टिममा उपकप्तान रोहित चन्दले घरेलु मैदानमा अन्तराष्ट्रिय खेल खेल्न पाउँदा टिमका सदस्यहरु खुसी भएको बताए ।

'विश्वकप छनोट खेल सरेपछि थ्री नेसन खेल हुदैछ । यसले खेलाडीलाई नयाँ उत्साह दिएको छ । घरेलु मैदानमा अन्तराष्ट्रिय खेल खेल्न पाउँदा सबै जना खुसी छन्,' रोहितले भने,' सिरिजमा राम्रो गर्छौ भन्ने सोचेका छौँ ।'

दोस्रो खेलमा नेपालले बंगलादेशसँग खेल्नेछ । नेपाल र बंगलादेशबीचको खेल चैत १४ गते हुनेछ ।

राउण्ड रोबिनको आधारमा हुने लिगको शीर्ष दुई टिमले फाइनलमा प्रतिस्पर्धा गर्ने छन् ।

फाइनल खेल चैत १६ गते हुनेछ ।