सोनुको किफायती बलिङमा बागमतीको पहिलो जित
काठमाडौं । बागमती प्रदेशले काठमाडौं मेयर्स कप एकदिवसीय पुरुष क्रिकेट प्रतियोगितामा पहिलो जित निकालेको छ ।
मंगलबार भएको खेलमा विभागीय टिम एपीएफ क्लबलाई २७ रनले पराजित गर्दै बागमतीले पहिलो जित निकालेको हो ।
टियु क्रिकेट मैदानमा बागमतीले दिएको २ सय ३४ रनको लक्ष्य पछ्याएको एपीएफले ४४ ओभर ५ बलमा अलआउट हुँदै २ सय ६ बनाउन सक्यो ।
आशिफ शेखले ५० रनको अर्धशतकीय इनिङ्स खेलेपनि एपीएफलाई जित दिलाउन सकेनन् ।
यस्तै एपीएफका लागि शंकर रानाले २९ रन जोड्दा अमर रौटेलाले २७ रन बनाए ।
त्यस्तै सन्दीप जोराले २५ रन जोड्दा भुवन कार्कीले १४ रन बनाए ।
एपीएफलाई रोक्न बागमतीका सोनु देवकोटाले ६ विकेट लिए । किफायती बलिङ गरेका उनले ४१ रन खर्चिए ।
यस्तै रामनरेश गिरि र अरियो पौडेलले २/२ विकेट लिए ।
यस अघि टस हारेर पहिले ब्याटिङ गरेको बागमतीले ५० ओभर खेल्दै ६ विकेट गुमाएर २ सय ३३ रन बनाएको थियो ।
बागमतीका लागि कप्तान ज्ञानेन्द्र मल्ल र नन्दन यादवले अर्धशतकीय इनिङ्स खेले ।
तेस्रो विकेटको रुपमा आउट भएका कप्तान मल्लले ८४ बलमा ७ चौकासहित ५७ रन बनाए ।
यस्तै नन्दनले ५६ बलमा ७ चौका र २ छक्कासहित अविजित रहदै ६० रन बनाए ।
आदील खानले ३४ रन जोड्दा सोनु देवकोटा ५ रनमा अविजित रहे ।
इशान पाण्डेले ३१ रन जोडे भने पारस खड्का २९ रन बनाएर पेभेलियन फर्किए ।
पृथु बास्कोटा ५ रनमा आउट हुँदा आकाश थापा १ रनमा आउट भए ।
एपीएफका अमर रौटेला र किशोर महतोले २/२ विकेट लिए ।
जितसँगै बागमतीले ३ खेलमा २ अंक जोडेको छ ।
पहिलो खेलमा पुलिससँग २ रनले पराजित बागमती दोस्रो खेलमा काठमाडौं मेयर-११ सँग ९४ रनले पराजित भएको थियो ।
एपीएफको यो पहिलो हार हो ।
एपीएफले पहिलो खेलमा त्रिभुवन आर्मी क्लबलाई १ विकेटले हराएको थियो ।
यस्तै दोस्रो खेलमा पुलिसमाथि पनि १ विकेटको जित निकालेको थियो ।
एपीएफले ३ खेलमा ४ अंक जोडेको छ ।
