काठमाडौं । पहिलो संस्करणको काठमाडौं मेयर कप एकदिवसीय पुरुष क्रिकेट प्रतियोगितामा आज एक खेल हुँदैछ ।
टियु क्रिकेट मैदानमा हुने एक मात्र खेलमा त्रिभुवन आर्मी क्लब र काठमाडौं मेयर-११ बीच प्रतिस्पर्धा हुनेछ । आर्मी र काठमाडौंबीचको खेल बिहान ८:४५ बजे सुरु हुनेछ ।
काठमाडौंविरुद्ध मैदान उत्रदा विभागीय टिम आर्मी पहिलो जितको खोजीमा हुनेछ ।
पीयम कप क्रिकेटको विजेता आर्मी पहिलो खेलमा पराजित भएको थियो ।
विनोद भण्डारीको कप्तानीमा रहेको आर्मी उद्घाटन खेलमा एपीएफसँग १ विकेटले पराजित भएको हो ।
आर्मी अंक विहीन रहेको छ ।
काठमाडौं भने लगातार दोस्रो जित निकाल्ने लक्ष्यमा हुनेछ ।
सन्दीप लामिछानेको कप्तानीमा रहेको काठमाडौंले पहिलो खेलमा बागमती प्रदेशलाई ९४ रनले हराएको थियो ।
काठमाडौंले प्रतियोगितामा १ खेलमा २ अंक जोडेको छ ।
