धनगढी । विद्या भुषण पब्लिक स्कुलले चण्डिका ग्रुप लिटल फ्लावर प्रिमियर लिग (एलपीएल) क्रिकेटमा लगातार दोस्रो जित निकालेको छ ।
शुक्रबार भएको खेलमा त्रिनगर स्कुललाई ६४ रनले हराउँदै विद्या भुषणले लगातार दोस्रो जित निकालेको हो ।
संघीय प्रहरी इकाई कार्यालयको खेल मैदानमा पहिले ब्याटिङ गरेको विद्या भुषणले १७ ओभरमा अलआउट हुँदै ९१ रन बनाएको थियो ।
विद्या भुषणका लागि प्रदिप चन्दले ३६ रन जोड्दा प्रवेश शाहले अविजित २३ रन बनाए ।
त्रिनगरका खडक नगरकोटीले ३ तथा पदम पनेरुले २ विकेट लिए ।
विद्या भुषणले दिएको ९२ रनको लक्ष्यसहित जवाफी ब्याटिङ गरेको त्रिनगरले ६ ओभर १ बलमा अलआउट हुँदै २७ रन मात्र बनाउन सक्यो ।
उसका शिशिर विष्टले सर्वाधिक ८ रन बनाए ।
त्रिनगरलाई सस्तैमा समेट्न विद्या भुषणका विरेन्द्र नाथले ६ विकेट लिए । शेर मल्लले ४ विकेट लिए ।
प्रतियोगितामा १६ टिमको सहभागिता रहेको छ ।
विजेताले १ लाख २० हजार पाउने छन् ।
त्यस्तै उपविजेताले ६० हजार प्राप्त गर्दा सर्वोत्कृष्ट खेलाडीले १० हजार पाउने छन् ।
उत्कृष्ट ब्याट्सम्यान, बलर र उदयमान खेलाडीले ५/५ हजार पाउने छन् ।
